पुणे: महाराष्ट्राची सांस्कृतिक राजधानी असलेल्या पुण्यात गुरुवार (दि. 5) ते शनिवार (दि. 7) दरम्यान नॅशनल स्कूल ऑफ ड्रामाच्या (एनएसडी) वतीने 25 वा ‘भारत रंग महोत्सव 2026 (बीआरएम)’ हा आंतरराष्ट्रीय नाट्य महोत्सव आयोजित केला आहे.
विधी महाविद्यालय रस्त्यावरील फिल्म ॲण्ड टेलिव्हिजन इन्स्टिट्यूट ऑफ इंडिया (एफटीआयआय) सभागृहात हा महोत्सव रंगणार आहे. महोत्सवात एनएसडी रेपर्टरी कंपनीची विविध विषयांवरील नाटके पाहायला मिळणार आहेत.
पुण्यातील भारत रंग महोत्सवाची सुरुवात गुरुवारी (दि. 5) इस्माईल चुनारा लिखित आणि राम गोपाल बजाज दिग्दर्शित ‘लैला मजनू’ या नाटकाने होईल. त्यानंतर शुक्रवारी (दि. 6) मिथिलेश्वर लिखित आणि राजेश सिंग दिग्दर्शित बाबूजी हे नाटक पाहायला मिळणार आहे.
तर पुण्याच्या भारत रंग महोत्सवाचा समारोप शनिवारी (दि.7) अजय शुक्ला लिखित आणि चित्तरंजन त्रिपाठी दिग्दर्शित ‘ताजमहाल का टेंडर’ या नाटकाचे होणार आहे. भारत रंग महोत्सव 2026 सर्व राज्यांमध्ये विविध ठिकाणी साजरा केला जात आहे. एनएसडीद्वारे आयोजित भारत रंग महोत्सव हा जगातील सर्वात मोठा नाट्य महोत्सव आहे.
या महोत्सवाची 25 वी आवृत्ती 27 जानेवारी ते 20 फेबुवारीपर्यंत 25 दिवस चालेल, ज्यामध्ये विविध सादरीकरणे पाहायला मिळणार आहेत, असे एनएसडीतर्फे प्रसिद्धीपत्रकाद्वारे सांगण्यात आले. महोत्सवाविषयी एनएसडीचे संचालक चित्तरंजन त्रिपाठी म्हणाले, एनएसडी आणि एफटीआयआयने एकत्र येऊन पुण्यात भारत रंग महोत्सव 2026 आयोजित केला आहे, याचा आनंद आहे. पुण्यातील भारत रंग महोत्सव 2025 हा रंगभूमी आणि चित्रपटाचा एक सुंदर संगम ठरला होता. एफटीआयआयसोबत आणखी उपक्रम राबविणार आहेत.