Pune Auto Rickshaw Meter: पुण्यात रिक्षा मीटर विरुद्ध ॲप दर वाद चिघळला; संघटनांचा आक्रमक पवित्रा

रिक्षा व्यवसायाची ओळख असलेल्या मीटरची जागा आता मोबाईल ॲप्सनी घेतली आहे. पूर्वी मीटर दरवाढीसाठी आंदोलने व्हायची. मात्र, आता ॲप कंपन्यांचे दर ठरवण्याचे अधिकार शासनाकडे उरले नाहीत. कंपन्या मनाप्रमाणे दर ठरवत आहेत. आरटीए (रिजनल ट्रान्सपोर्ट ॲथोरिटी)ने ठरवलेल्या दराकडे सर्रासपणे दुर्लक्ष केले जात आहे. यामुळे प्रवासी आणि रिक्षाचालकांमध्ये वाद होत आहेत, हे थांबविण्यासाठी रिक्षा मीटरचा वापर बंधनकारक करणे आवश्यक आहे.

ऑनलाइन सेवा देणाऱ्या कोणत्याही कंपनीने अद्याप कायदेशीर ॲग््रािगेटर परवानगी घेतलेली नाही. त्यामुळे त्यांचे दर अनिश्चित आहेत. रिक्षाला मीटर असल्यामुळे चालकांनी मीटरनेच व्यवसाय करणे कायदेशीर आणि हिताचे आहे.

पुणे आरटीए कमिटीने पहिल्या 1.5 कि.मी. साठी 25 रुपये आणि त्यानंतर प्रति कि.मी. 17 रुपये असा दर निश्चित केला आहे. ॲप कंपन्यांना हा दर बदलण्याचा कोणताही अधिकार नाही.

आमच्या संघटनेचे सभासद आजही मीटरचाच वापर करतात. रिक्षा स्टॅंडवरून प्रवाशांना सेवा देताना मीटरचा वापर करणे, ही एक शिस्त आहे. सर्वांनी मीटरचा वापर केल्यास ॲप कंपन्यांची मनमानी संपेल.

राज्यात प्रवासी आणि रिक्षाचालक यांच्यातील भाड्याचा व्यवहार हा शासनमान्य मीटरवर आधारित असावा हा नियम आहे. परंतु ओला, उबेर, रॅपिडोसारख्या कंपन्यांनी ॲपच्या माध्यमातून दर नियंत्रित करून एक समांतर व्यवस्था उभी केली आहे. जी कायद्याच्यादृष्टीने बेकायदेशीर आहे.