पुणे: वैद्यकीय पदवी अभ्यासक्रमांच्या प्रवेश प्रक्रियेसाठीऑल इंडिया कोटा आणि राज्य कोट्याचे अधिकृत वेळापत्रक वैद्यकीय समुपदेशन समिती आणि राज्य प्रवेश प्राधिकरणांनी जाहीर केले आहे. एमबीबीएस बीडीएससह विविध वैद्यकीय अभ्यासक्रमांच्या प्रवेशासाठी प्रतीक्षेत असलेल्या हजारो विद्यार्थ्यांना यामुळे दिलासा मिळाला आहे.
चार टप्प्यांत होणाऱ्या या प्रवेश प्रक्रियेचे नियोजन करण्यात आले असून, सर्व प्रक्रिया वेळेत पूर्ण करण्यावर भर देण्यात आला आहे. नवीन शैक्षणिक वर्ष ८ सप्टेंबर २०२६ पासून सुरू होणार असल्याने प्रवेश प्रक्रिया यापूर्वीच पूर्ण होणे अपेक्षित आहे.
राज्य कोट्याची पहिली प्रवेश फेरी १३ ऑगस्ट ते २२ ऑगस्टदरम्यान पार पडणार आहे. या फेरीतील निवड झालेल्या विद्यार्थ्यांनी २८ ऑगस्टपर्यंत प्रवेश निश्चित करणे अनिवार्य आहे, तर ऑल इंडिया कोटा आणि डीम्ड विद्यापीठांसाठी पहिली समुपदेशन फेरी ४ ते १७ ऑगस्टदरम्यान होईल. या फेरीत निवड झालेल्या उमेदवारांना २२ ऑगस्टपर्यंत संबंधित महाविद्यालयात प्रवेश घ्यावा लागेल. दोन्ही कोट्यांतील प्रवेश प्रक्रिया पारदर्शक आणि ऑनलाइन पद्धतीने राबवली जाणार असल्याचे स्पष्ट केले आहे.
तिसऱ्या फेरीत ऑल इंडिया कोट्यासाठी १० ते १८ सप्टेंबरदरम्यान समुपदेशन प्रक्रिया राबवली जाईल. या फेरीतील प्रवेश २६ सप्टेंबरपर्यंत पूर्ण केले जातील. राज्य कोट्याची तिसरी फेरी १६ ते २६ सप्टेंबरदरम्यान होणार असून, प्रवेश प्रक्रिया १ ऑक्टोबरपर्यंत संपवण्याचे निर्देश देण्यात आले आहेत. उर्वरित जागा भरून काढण्यासाठी 'स्ट्रे व्हॅलन्सी' फेरीचेही नियोजन करण्यात आले आहे. यामध्ये ऑल इंडिया कोट्याची फेरी २८ सप्टेंबर ते ३ ऑक्टोबरदरम्यान, तर राज्य कोट्याची फेरी ३ ते ५ ऑक्टोबरदरम्यान पार पडेल. दोन्ही कोट्यांतील अंतिम प्रवेश १० ऑक्टोबरपर्यंत पूर्ण होणार आहेत.
प्रवेश प्रक्रिया सुरळीत व वेळेवर पूर्ण व्हावी, यासाठी सर्व वैद्यकीय महाविद्यालयांना शनिवार, रविवार आणि शासकीय सुट्ट्यांच्या दिवशीही कार्यालयीन कामकाज सुरू ठेवण्याचे निर्देश देण्यात आले आहेत. विद्यार्थ्यांनी वैद्यकीय समुपदेशन समिती आणि संबंधित राज्य प्रवेश वेबसाइट्सवर नियमित लक्ष ठेवावे. वेळापत्रक जाहीर झाल्याने विद्यार्थ्यांना आता नियोजन करण्यास मदत होईल. अधिक माहितीसाठी विद्यार्थ्यांनी अधिकृत वेबसाइट्सला भेट द्यावी, असे आवाहन केले आहे.