नारायणगाव: नारायणगाव पोलीस ठाण्याच्या हद्दीमध्ये पुणे नाशिक महामार्गावर मांजरवाडी रोडला पुलाखाली गांजा विक्री करणाऱ्या इसमाला मुद्देमालासह पकडून त्याच्याकडून साडेपाच लाख रुपयांचा गांजा सह मुद्देमाल जप्त केला असल्याची माहिती नारायणगाव पोलीस ठाण्याचे सहाय्यक पोलीस निरीक्षक महादेव शेलार यांनी दिली.
याबाबतची अधिक माहिती देताना शेलार म्हणाले की, पुणे ग्रामीणचे पोलीस अधीक्षक पंकज देशमुख यांनी पुणे जिल्ह्याच्या ग्रामीण भागात अवैधरीत्या चालू असलेल्या अंमली पदार्थ विरोधी मोहीम चालू करून अंमली पदार्थ विकणाऱ्यांवर तसेच जवळ बाळगणाऱ्यावर कठोर कारवाई करण्याचे आदेश सर्व पोलीस ठाण्यांना दिले.(Latest Pune News)
या सूचनांच्या अनुषंगाने अप्पर पोलीस अधीक्षक चोपडे, उपविभागीय पोलीस अधिकारी जुन्नर विभाग जुन्नर रवींद्र चौधर स्थानिक गुन्हे अन्वेषण वरिष्ठ पोलीस निरीक्षक अविनाश शिळीमकर यांचे मार्गदर्शनाखाली नारायणगाव पोलीस स्टेशनचे प्रभारी अधिकारी महादेव शेलार यांनी पोलीस उपनिरीक्षक विनायक दडस पाटील, पोलीस उपनिरीक्षक जगदेव पाटील, पोलीस शिपाई सत्यम केळकर, पोलीस शिपाई सुभाष थोरात, पोलीस शिपाई गोरक्ष केंद्रे, पोलीस पाटील जाधव, महिला पोलीस शिपाई शितल गारगोटे , पोलीस हवलदार संतोष कोकणे, वनपरिक्षेत्राधिकारी श्री प्रदीप चव्हाण, शासकीय पंच यांचे पथक तयार करून गोपनीय माहितीच्या आधारे ही कारवाई केली.
दिनांक 16 मे 2025 रोजी रात्री 12 ते 1 दरम्यान संशयित इसम आकाश शिंदे( वय 25)यास वारूळवाडी, (ता. जुन्नर जि. पुणे )या गावाचा हद्दीत पुणे नाशिक हायवेच्या मांजरवाडी पुलाखाली रंगेहात पकडले असून त्याच्याकडून 4.8 किलोग्रॅम वजनाचा गांजा, एक वजनकाटा, एक काळ्या रंगाची चारचाकी गाडी असा एकूण 5,49,000 रूपये किंमतीचा मुद्देमाल जप्त करण्यात आला आहे.
आरोपी आकाश शिंदे यांच्या विरुद्ध गुन्हा दाखल करण्यात आला असून सदर गुन्ह्याचा अधिक तपास पोलीस उपनिरीक्षक विनायक दडस पाटील हे करीत आहेत, अशी माहिती सहाय्यक पोलीस निरीक्षक महादेव शेलार यांनी दिली.
दरम्यान ही कारवाई नारायणगाव पोलीस स्टेशनचे प्रभारी अधिकारी महादेव शेलार, पोलीस उपनिरीक्षक विनायक दडस पाटील, पोलीस उपनिरीक्षक जगदेव पाटील, पोलीस शिपाई सत्यम केळकर, पोलीस शिपाई सुभाष थोरात, पोलीस शिपाई गोरक्ष केंद्रे, पोलीस पाटील जाधव, महिला पोलीस शिपाई शितल गारगोटे , पोलीस हवालदार संतोष कोकणे, वनपरिक्षेत्राधिकारी श्री प्रदीप चव्हाण तसेच स्थानिक गुन्हे शाखेचे पोलीस हवालदार दीपक साबळे, संदीप वारे व पोलीस शिपाई अक्षय नवले यांचे पथकाने केले आहे.