पुणे: विवाहाच्या आमिषाने बिबवेवाडी भागातील एका ज्येष्ठ नागरिकाची साडेअकरा लाख रुपयांची फसवणूक करणाऱ्या नागपूरमधील एका तरुणीला पोलिसांनी अटक केली. तिने फसवणूक केलेली रक्कम पोलिसांनी जप्त केली आहे. (Latest Pune News)
हर्षला राकेश डेंगळे (वय 28, रा. न्यू ओमनगर, हुडकेश्वर रोड, नागपूर) असे अटक केलेल्या तरुणीचे नाव आहे. याबाबत ज्येष्ठ नागरिकाने बिबवेवाडी पोलिस ठाण्यात फिर्याद दिली होती. फिर्यादींनी एका वृत्तपत्रात विवाहविषयक जाहिरात वाचली होती. या जाहिरातीतील संपर्क क्रमांकावर त्यांनी 18 एप्रिल 2025 रोजी संपर्क साधला. त्यानंतर ममता जोशी असे नाव आरोपी हर्षला डेंगळेने त्यांना सांगितले. त्यानंतर तिने ज्येष्ठ नागरिकाला जाळ्यात ओढले. ’तेव्हा कोल्हापूरला आले आहे. माझ्या मावसबहिणीचा अपघात झाला असून उपचारासांठी तातडीने पैशांची गरज आहे. पुण्यात परत आल्यानंतर पैसे परत करते’, असे डेंगळेने त्यांना सांगितले. त्यानंतर वेगवेगळी कारणे सांगून तिने ज्येष्ठ नागरिकाकडून वेळोवेळी अकरा लाख 47 हजार रुपये ऑनलाइन पद्धतीने जमा करून घेतले.
त्यानंतर डेंगळेने वेगवेगळी कारणे सांगून त्यांच्याकडे पैशांची मागणी केली. फसवणूक झाल्याचे लक्षात आल्यानंतर ज्येष्ठ नागरिकाने 1 जून रोजी पोलिसांकडे तक्रार दिली. याप्रकरणी फसवणूक, तसेच माहिती- तंत्रज्ञान कायद्यान्वये गुन्हा दाखल करण्यात आला. बिबवेवाडी पोलिसांकडून या प्रकरणाचा तपास करण्यात आला. तांत्रिक तपासात आरोपी हर्षला डेंगळेने फसवणूक केल्याचे उघडकीस आले.
ती नागपूरमध्ये वास्तव्यास असल्याची माहिती मिळाली. त्यानंतर पोलिसांच्या पथकाने तिला ताब्यात घेतले. तिच्याकडून तीन मोबाइल संच, तसेच 11 लाख 45 हजार रुपये जप्त करण्यात आले. अटक केल्यानंतर तिला शिवाजीनगर न्यायालयात हजर करून तिच्याविरुद्ध अराोपपत्र दाखल करण्यात आले. न्यायालयाने तिला जामीन मंजूर केला आहे.
पोलिस उपायुक्त डॉ. राजकुमार शिंदे, सहायक आयुक्त धन्यकुमार गोडसे यांच्या मार्गदर्शनाखाली बिबवेवाडी पोलिस ठाण्याच्या वरिष्ठ पोलिस निरीक्षक अश्विनी सातपुते, गुन्हे शाखेचे निरीक्षक सूरज बेंद्रे, पोलिस कर्मचारी संतोष जाधव, विशाल जाधव, मेधा गायकवाड, प्रतिक करंजे यांनी ही कामगिरी केली.