पांढरेवाडी: कुरकुंभ (ता. दौंड) औद्योगिक वसाहतीमुळे एकीकडे कारखानदारीचा विस्तार झाला असला तरी प्रदूषणामुळे आसपासच्या परिसरातील नागरिक हैराण झाले आहेत. स्थानिक शेतकऱ्यांच्या नैसर्गिक जलस्रोतांच्या सुरक्षिततेचा प्रश्न पुन्हा एकदा ऐरणीवर आला आहे. कुरकुंभ येथील शेतकरी मोहन अण्णा भोसले यांच्या विहिरीत आणि विहिरीच्या परिसरात दूषित पाणी उतरले आहे. विहिरीतील पाण्यावर हिरवट थर दिसून येत आहे. पाण्याला उग्र वास येत असल्याने शेतकऱ्यांच्या चिंतेत भर पडली आहे.
भोसले यांच्या विहिरीतील पाण्याची गुणवत्ता संशयास्पद बनल्याने शेतीसाठी या पाण्याचा वापर करायचा कसा, असा प्रश्न निर्माण झाला आहे. कुरकुंभ एमआयडीसी परिसरातील औद्योगिक सांडपाणी व्यवस्थापनाचा विषय यानिमित्ताने पुन्हा चर्चेत आला आहे.
औद्योगिक क्षेत्रातील सांडपाण्यावर योग्य प्रक्रिया केली जाते का? प्रक्रिया न केलेले पाणी जमिनीत झिरपून परिसरातील विहिरींच्या पाण्यात मिसळते का? औद्योगिक सांडपाण्याच्या निचऱ्यावर संबंधित यंत्रणांचे पुरेसे नियंत्रण आहे का? असे अनेक प्रश्न यामुळे उपस्थित होत आहेत.
औद्योगिक विकासामुळे रोजगार आणि आर्थिक प्रगतीला चालना मिळत असली, तरी त्याच परिसरातील शेतकऱ्यांच्या पिण्याच्या आणि शेतीच्या पाण्याची सुरक्षितता धोक्यात येणे ही बाब गंभीर आहे. विहिरीतील पाणी दूषित होण्यामागील नेमके कारण प्रशासनाने शोधावे, अशी मागणी होत आहे.
या पार्श्वभूमीवर महाराष्ट्र प्रदूषण नियंत्रण मंडळाने तातडीने संबंधित विहिरीची पाहणी करून पाण्याचे नमुने प्रयोगशाळेत तपासावेत. तसेच एमआयडीसीमधील सांडपाणी प्रक्रिया केंद्र, निचरा व्यवस्था आणि संबंधित उद्योगांच्या सांडपाणी व्यवस्थापनाची तपासणी करावी. दोषी आढळणाऱ्यांवर नियमानुसार कारवाई करावी, अशी अपेक्षा ग्रामस्थांकडून व्यक्त होत आहे. प्रशासन या प्रकाराची गांभीर्याने दखल घेणार का, याकडे शेतकरी आणि ग्रामस्थांचे लक्ष लागले आहे.