पुणे : कौटूंबिक कारणातून झालेल्या वादात पत्नीने पतीच्या चेहऱ्यावर उकळता चहा टाकल्याची घटना कोथरूड भागात घडली. याप्रकरणी पत्नीच्या विरुद्ध कोथरूड पोलीस ठाण्यात गुन्हा दाखल करण्यात आला आहे.
याबाबत एका २७ वर्षीय तरुणाने कोथरूड पोलीस ठाण्यात फिर्याद दिली आहे. त्याने दिलेल्या फिर्यादीनुसार, आरोपी २३ वर्षीय पत्नीविरुद्ध गुन्हा दाखल करण्यात आला आहे. ही घटना बुधवारी (दि.31) सकाळी साडे दहा वाजताच्या सुमारास वसंतनगर कोथरुड परिसरात घडली आहे.
पोलिसांनी दिलेल्या माहितीनुसार, आरोपी तरुणीचा फिर्यादी तरुणासोबत दोन वर्षांपूर्वी विवाह झाला आहे. पती खासगी ठिकाणी सुरक्षारक म्हणून नोकरी करत आहे. तो आणि त्याची पत्नी वसंतनगर कोथरुड भागात राहायला आहेत. गेल्या काही दिवसांपासून त्यांच्यात कौटुंबिक कारणावरुन वाद सुरू होते.
बुधवारी (३१ डिसेंबर) सकाळी फिर्यादी तरुण झाेपला होता. सकाळी साडेदहाच्या सुमारास पत्नीने पतीला झोपेतून उठवले. पतीने झोपेचे सोंग केल्याचा आरोप तिने केला .त्यावरून दोघांमध्ये किरकोळ कारणावरुन वाद झाला.
वादातून तिने गॅसवर ठेवलेला उकळता चहा पतीच्या चेहऱ्यावर टाकला. या घटनेत तरुणाच्या चेहऱ्याला दुखापत झाल्याचे फिर्यादीत नमूद करण्यात आले आहे. पोलीस हवालदार एम. जी. दळवी तपास करत आहेत.