पुणे : पुणे महापालिकेच्या सर्वांत मोठ्या कमला नेहरू रुग्णालयासाठी मंजूर १३ कोटी रुपयांच्या निधीतून सुरू असलेल्या अत्याधुनिकीकरणाच्या कामाची माजी सभागृह नेते गणेश बिडकर यांनी सोमवारी पाहणी केली. दरम्यान, या कामाचे औपचारिक भूमिपूजन मुख्यमंत्री देवेंद्र फडणवीस यांच्या हस्ते 'पुण्याचे प्रगतीपर्व' या कार्यक्रमादरम्यान करण्यात आले.
पुणे महापालिकेचे सहायक आरोग्य अधिकारी डॉ. संजीव वावरे, कमला नेहरू रुग्णालयाचे वैद्यकीय अधीक्षक डॉ. प्रशांत बोठे आणि रुग्णालयाचे इतर विभागप्रमुख यांच्यासमवेत बिडकर यांनी अत्याधुनिकीकरणाच्या प्रगतीचा आढावा घेतला. कमला नेहरू रुग्णालयात पाच अद्ययावत ऑपरेशन थिएटर्सची उभारणी सुरू आहे.
रुग्णालयाचे विस्तारीकरण, सुशोभीकरण, रुग्णांसाठी प्रतीक्षालय, उपहारगृह, ऑन-ग्रीड सोलर यंत्रणेची उभारणी अशी कामेही याअंतर्गत केली जाणार आहेत. रुग्णांची वाढती संख्या पाहता २५ तज्ज्ञ डॉक्टर आणि इतर मनुष्यबळ यांची भरतीप्रक्रिया पूर्ण करण्यात आली आहे.
कमला नेहरू रुग्णालयात लहान मुलांसाठी अतिदक्षता विभाग व ऑपरेशन थिएटर सुरू करण्याचा विचार आहे, अशी माहिती डॉ. बोठे यांनी दिली. शहराच्या मध्यवर्ती भागात वसलेले ४३० बेडचे कमला नेहरू रुग्णालय हे भारतरत्न अटलबिहारी वाजपेयी वैद्यकीय महाविद्यालयाशी संलग्न आहे. या रुग्णालयात पुणे मनपाचे इतर दवाखाने व खासगी रुग्णालयातून रुग्ण उपचारांसाठी पाठवले जातात.
या रुग्णालयाचा कायापालट करण्यासाठी बिडकर यांना कायम पुढाकार घेतला आहे. दोन मजल्यांवरून बहुमजली झालेले कमला नेहरू रुग्णालय हे बिडकर यांच्या प्रयत्नांमधून उभे राहिले आहे. स्थायी समितीचे अध्यक्ष असताना बिडकर यांच्या प्रयत्नांतून कमला नेहरू रुग्णालयाच्या नूतनीकरणासाठी मोठा निधी उपलब्ध झाला होता.
-------------
फोटो - १६ कलर ४, ५
ओळ - कमला नेहरू रुग्णालयात नव्याने बांधल्या जाणाऱ्या ऑपरेशन थिएटरची पाहणी करताना गणेश बिडकर यांच्या समवेत महापालिकेच्या आरोग्य विभागाचे अधिकारी.