पुणे : महाराष्ट्रीय कलोपासक आयोजित पुरुषोत्तम करंडक आंतर महाविद्यालयीन एकांकिका स्पर्धेत हडपसरमधील अण्णासाहेब मगर महाविद्यालयाने सादर केलेल्या 'काही प्रॉब्लेम ये का?' एकांकिकेने बाजी मारत हीरकमहोत्सवी पुरुषोत्तम करंडकावर आपले नाव कोरले आहे. तर मॉडर्न महाविद्यालय गणेशखिंड संघाला 'वामन आख्यान' एकांकिकेसाठी सांघिक द्वितीय क्रमांकाचा हरी विनायक करंडक तर सांघिक तृतीय क्रमांकाचा संजीव करंडक सर परशुरामभाऊ महाविद्यालयाच्या संघाने 'आतल्या गाठी' या एकांकिकेसाठी पटकाविला आहे.
सर्वोकृष्ट प्रायोगिक एकांकिकेसाठी असलेले जयराम हर्डीकर स्मृतिचिन्हासाठी यावर्षी एकही एकांकिका पात्र ठरलेली नाही. तर सर्वोत्कृष्ट वैयक्तिक अभिनय नैपुण्य विभागात पारितोषिक देण्यात आलेले नाही.
हीरकमहोत्सवी पुरुषोत्तम करंडक एकांकिका स्पर्धेची अंतिम फेरी शनिवारी (दि.१३) आणि रविवारी (दि.१४) सदाशिव पेठेतील भरत नाट्य मंदिरात आयोजित केली होती. प्राथमिक फेरीतून अंतिम फेरीत पोहचलेल्या नऊ संघाचे तीन सत्रात सादरीकरण झाले. स्पर्धेचा निकाल रविवारी (दि.१४) रात्री जाहीर करण्यात आला. योगेश सोमण, अश्विनी गिरी, प्रदीप वैद्य यांनी स्पर्धेचे परीक्षण केले. विद्यार्थ्यांनी निकाल जाहीर होताच जल्लोष केला.
- सांघिक प्रथम : काही प्रॉब्लेम ये का? (अण्णासाहेब मगर महाविद्यालय, हडपसर)
- सांघिक द्वितीय : वामन आख्यान (मॉडर्न महाविद्यालय, गणेशखिंड)
- सांघिक तृतीय : आतल्या गाठी (सर परशुरामभाऊ महाविद्यालय)
- सर्वोत्कृष्ट प्रायोगिक एकांकिकेसाठी असलेले जयराम हर्डीकर स्मृतिचिन्ह : पारितोषिक दिलेले नाही
- सर्वोत्कृष्ट आयोजित संघ : भगीरथ करंडक : पुणे विद्यार्थी गृहाचे अभियांत्रिकी आणि तंत्रज्ञान महाविद्यालय (कोयता)
स्पर्धेतील इतर निकाल
- सर्वोत्कृष्ट विद्यार्थी लेखक : अथर्व किरवे, क्षितिज दीक्षित (कोयता, पुणे विद्यार्थी गृहाचे अभियांत्रिकी महाविद्यालय)
- सर्वोत्कृष्ट विद्यार्थी प्रायोगिक लेखक : सोहम कुलकर्णी, इश्वरी जोशी (हॅपी बर्थडे कप केक, फर्ग्युसन महाविद्यालय, स्वायत्त)
- उत्तेजनार्थ विद्यार्थी लेखिका : अपूर्वा काळपुंड (पिसाळा, न्यू आर्टस्, कॉमर्स, सायन्स कॉलेज)
- सर्वोत्कृष्ट दिग्दर्शक : आस्था काळे (काही प्राब्लॅम ये का?, अण्णासाहेब मगर कॉलेज, हडपसर)
- उत्तेजनार्थ दिग्दर्शन : (अंतिम फेरी) : अनिकेत खरात, विराज दिघे (वामन आख्यान, मॉडर्न महाविद्यालय, गणेशखिंड)
- उत्तेजनार्थ दिग्दर्शन : (अंतिम फेरी) : अद्वय पूरकर, शाश्वती वझे, समर्थ खळदकर (आतल्या गाठी, सर परशुरामभाऊ महाविद्यालय)
- अभिनय नैपुण्य (अभिनेता) : ओमकार कापसे (प्रतिक, काही प्रॉब्लेम ये का?, अण्णासाहेब मगर महाविद्यालय, हडपसर)
- अभिनय नैपुण्य (अभिनेत्री) : शाश्वती वझे (जुई, आतल्या गाठी, सर परशुरामभाऊ महाविद्यालय)
- वाचिक अभिनय नैपुण्य : तृप्ती येवले (म्हातारी, रामरक्षा, आयएमसीसी)
- अभिनय उत्तेजनार्थ (अंतिम फेरी) विभागातही पारितोषिके जाहीर झाली आहेत.