पुणे : पुढारी वृत्तसेवा : अभियांत्रिकी, व्यवस्थापन, आर्किटेक्चर आणि इतर तांत्रिक महाविद्यालयांतील विद्यार्थ्यांना आता स्थानिक भाषेत अभ्यासासोबत शोधनिबंध तयार करता येणार आहेत. ऑल इंडिया कौन्सिल फॉर टेक्निकल एज्युकेशन अर्थात 'एआयसीटीई'ने त्यांच्या संलग्न तांत्रिक महाविद्यालयातील विद्यार्थ्यांसाठी व्हायब्रंट अॅडव्होकेसी फॉर अॅडव्हान्समेंट अँड इन्चरिंग ऑफ इंडियन लँग्वेजेस अर्थात 'वाणी' योजना सुरू केली आहे. विद्यार्थ्यांना भारतीय भाषेतून अभ्यासासोबतच संशोधनाशी जोडणे हा या योजनेचा उद्देश आहे, अशी माहिती 'एआयसीटीई'चे अध्यक्ष टी. जी. सीताराम यांनी दिली.
या उपक्रमांतर्गत तांत्रिक महाविद्यालयांना 12 स्थानिक भाषांमध्ये 100 परिषदा परिसंवाद, दोन ते तीन दिवसांच्या कार्यशाळा आयोजित कराव्या लागणार आहेत. या भाषांमध्ये मराठी, हिंदी, पंजाबी, गुजराती, उर्दू, ओरिया, तेलगू, आसामी, मल्याळम, कन्नड, तमिळ आणि बंगाली या भाषांचा समावेश आहे. महाविद्यालयांना सेमीकंडक्टर, अंतराळ आणि संरक्षण, आपत्ती व्यवस्थापन या विषयांवर कार्यक्रम आयोजित करावे लागतील. प्रत्येक भाषेसाठी आठ परिषदा आयोजित कराव्या लागतील. तर 12 परिषदा हिंदीत आयोजित कराव्या लागणार आहेत. विशेष बाब म्हणजे 12 उदयोन्मुख भागात 12 प्रादेशिक भारतीय भाषांमध्ये कार्यक्रम, परिसंवाद आणि परिषदा आयोजित करण्यासाठी तांत्रिक महाविद्यालयांना 2 कोटी रुपयांची वार्षिक मदतही दिली जाणार आहे.
हेही वाचा