पुणे : नाना पेठेतील डोके तालीम परिसरात बेकायदा फ्लेक्स लावल्याप्रकरणी आंदेकर टोळीचा म्होरक्या बंडू आंदेकरसह त्याच्या कुटुंबीयांविरुद्ध गुन्हा दाखल करण्यात आला. याप्रकरणी समर्थ पोलिस ठाण्यात दोन स्वतंत्र गुन्हे दाखल केले आहेत. याबाबत पुणे महापालिकेतील अधिकाऱ्यांनी फिर्याद दिली आहे.(Latest Pune News)
दिलेल्या फिर्यादीनुसार, आंदेकर टोळीचा म्होरक्या सूर्यकांत ऊर्फ बंडू राणोजी आंदेकर, कृष्णा बंडू आंदेकर, माजी नगरसेविका लक्ष्मी उदयकांत आंदेकर, शिवम उदयकांत आंदेकर, अभिषेक उदयकांत आंदेकर, शिवराज उदयकांत आंदेकर, सोनाली वनराज आंदेकर, प्रियंका कृष्णा आंदेकर यांच्याविरुद्ध गुन्हा दाखल केला आहे. नाना पेठेतील इनामदार कॉम्प्लेक्स इमारतीच्या परिसरात आंदेकर टोळीने बेकायदा फलक लावले होते. उच्च न्यायालयाच्या आदेशाचा भंग, तसेच शहराचे विद्रूपीकरण केल्याप्रकरणी आंदेकर टोळीविरुद्ध गुन्हा दाखल करण्यात आला.
महापालिकेतील अधिकाऱ्यांनी बेकायदा फ्लेक्स प्रकरणात आणखी एक फिर्याद दिली आहे. त्यानुसार बंडू आंदेकर, कृष्णा आंदेकर, शिवम आंदेकर, रफिक सय्यद, इबाहीम शेख या पाच जणांविरुद्ध गुन्हा दाखल केला आहे. पोलिस हवालदार सचिन गायकवाड तपास करत आहेत. दरम्यान, आंदेकर टोळीने केलेल्या बेकायदा बांधकामांवर पोलिसांनी महापालिकेच्या मदतीने नुकतीच कारवाई केली. या कारवाईत पत्र्याचे शेड, तात्पुरते केलेले बांधकाम, तसेच गणेश पेठेतील नागझरीत बेकायदा सुरू केलेल्या मासळी बाजारात ही कारवाई करण्यात आली.