फुरसुंगी: फुरसुंगी-उरुळी देवाची नगरपरिषद हद्दीतील चौरंग टेरेस सोसायटीमध्ये 'सार्वजनिक नळ कोंडळ प्रकल्पा'अंतर्गत सामाईक पाणी पुरवठ्यासाठी प्रत्येक फ्लॅटकडून तब्बल दोन हजार रुपये शुल्क आकारण्यात आल्याचा मुद्दा सध्या चर्चेत आला आहे. आठवड्यातून केवळ तीन दिवस आणि साधारण एक तास पाणीपुरवठा होत असताना हे शुल्क कोणत्या आधारावर आकारण्यात आले, असा सवाल रहिवाशांकडून उपस्थित करण्यात येत आहे.
रहिवाशांच्या म्हणण्यानुसार, सोसायटीमध्ये नियमित व पुरेसा पाणीपुरवठा होत नसताना प्रत्येक फ्लॅटकडून दोन हजार रुपये शुल्काची आकारणी करण्यात आली आहे. त्यामुळे या शुल्काची आकारणी कोणत्या नियम, आदेश किंवा निकषानुसार करण्यात आली, याबाबत नगर परिषद प्रशासनाने स्पष्टता द्यावी, अशी मागणी होत आहे.
प्रत्येक घराला स्वतंत्र नळ कनेक्शन देण्यात आले असेल आणि ते नगर परिषदेच्या अधिकृत पाणीपुरवठा व्यवस्थेअंतर्गत असेल, तर नियमानुसार पाणीपट्टी आकारणी करण्याची तरतूद असू शकते. मात्र, त्यासाठी आकारण्यात येणारे शुल्क, त्याची गणना आणि लागू असलेले नियम नागरिकांना स्पष्टपणे कळविणे आवश्यक असल्याचे रहिवाशांचे म्हणणे आहे.
दरम्यान, सातववाडी-गोंधळेनगर परिसरात काही वर्षांपूर्वी अशाच पद्धतीने पाणीपट्टी आकारण्यात आली होती. त्या वेळी नागरिकांनी आक्षेप घेतल्यानंतर संबंधित पाणीपट्टी कमी करण्यात आली होती, असा दाखला रहिवाशांकडून देण्यात येत आहे.
चौरंग टेरेस सोसायटीतील पाणीपुरवठ्याचे प्रत्यक्ष प्रमाण, प्रत्येक कनेक्शनचा प्रकार, पाणीपट्टीचा अधिकृत दर आणि दोन हजार रुपये शुल्काची नेमकी गणना याबाबत नगरपरिषद प्रशासनाने माहिती जाहीर करावी, अशी मागणी रहिवाशांनी केली आहे. त्यामुळे पाणी किती मिळते आणि त्यासाठी शुल्क किती आकारले जाते, याचा ताळमेळ प्रशासनाने स्पष्ट करावा, अशी अपेक्षा व्यक्त होत आहे.