पिंपरी; पुढारी वृत्तसेवा : खंडणी विरोधी पथकाने चार सराईत गुन्हेगारांना सापळा रचून अटक केली. त्यांच्याकडून पाच पिस्तूल आणि दहा काडतुसे जप्त करण्यात आली आहेत. अस्लम शेख (रा. थेरगाव), सचिन महाजन (रा. सुरवड, ता. इंदापूर), संतोष नातू (रा. स्वारगेट, पुणे), राहुल ढवळे (रा. पिंपळगाव, ता. दौंड) अशी अटक केलेल्या आरोपींची नावे आहेत.
पोलिस उपायुक्त स्वप्ना गोरे यांनी दिलेल्या माहितीनुसार, खंडणी विरोधी पथकातील पोलिस रमेश गायकवाड, गणेश गिरिगोसावी, विजय नलगे रहाटणी येथे गस्त घालत होते. दरम्यान, त्यांना जगताप डेअरी चौकात एकजण थांबला असून त्याच्याकडे शस्त्र असल्याची माहिती मिळाली. त्यानुसार, पथकाने सापळा लावून अस्लम शेख याला ताब्यात घेत त्याच्याकडून एक पिस्तूल जप्त केले. त्यानंतर त्याच्या तीन साथीदारांना अटक करून आणखी चार पिस्तूल आणि दहा काडतुसे, असा एकूण दोन लाख 55 हजारांचा ऐवज पोलिसांनी जप्त केला.
आरोपी सचिन, संतोष, राहुल हे रेकॉर्डवरील गुन्हेगार आहेत. त्यांच्यावर पुणे, पुणे ग्रामीण आणि सोलापूर येथे दरोडा, खून, खुनाचा प्रयत्न, खंडणीसाठी अपहरण, जबरी चोरी, जबर दुखापत करणे, बेकायदेशीरपणे अग्नी शस्त्र बाळगणे, असे गुन्हे दाखल आहेत. आरोपी सचिन महाजन याच्यावर पुणे ग्रामीण पोलिसांनी मोकाची कारवाई केली आहे. तर, संतोष नातू याला पुणे पोलिसांनी तडीपार केले आहे.
वरिष्ठ पोलिस निरीक्षक अरविंद पवार, सहा. पोलिस निरीक्षक उध्दव खाडे, सहा. पोलिस उपनिरीक्षक रमेश गायकवाड, अमर राऊत, निशांत काळे, गणेश गिरिगोसावी, विजय नलगे, सुनील कानगुडे, किरण काटकर, प्रदीप गोडांबे, आशिष बोटके, रमेश मावसकर यांच्या पथकाने ही कारवाई केली आहे.
हेही वाचा