Leopard Attack News: मुलावर हल्ला करणार्या बिबट्याला पकडण्यात दोन दिवस उलटूनही वन विभागाला यश आले नाही. त्यामुळे ग्रामस्थांनी नाराजी व्यक्त केली आहे. मांडवगण फराटा (ता. शिरूर) येथील गोकुळनगर येथे एका सात वर्षांच्या मुलावर दोन दिवसांपूर्वी बिबट्याने हल्ला केला होता.
त्या घटनेमध्ये मुलाचा मृत्यू झाला होता. या घटनेनंतर वन विभागाने तातडीने पिंजरे लावले, परंतु अद्याप बिबट्या सापडलेला नाही. वन विभागाच्या अधिकार्यांनी या परिसरामध्ये अजून पिंजरे लावून बिबट्याला पकडण्यासाठी लवकरात लवकर प्रयत्न करावे, अशी मागणी होत आहे.
मुलाचा मृत्यू पाहून आईची अवस्था बिकट झाली आहे. या कुटुंबाला अद्याप शासनाकडून कोणतीच मदत जाहीर करण्यात आली नाही. या कुटुंबाला लवकरात लवकर शासकीय मदत द्यावी, अशीही मागणी आता ग्रामस्थांनी केली आहे.
ही घटना घडल्यापासून ऊस तोडीवरील कामगार देखील ऊस तोडण्यासाठी गेले नाहीत. ऊस तोडायला गेल्यानंतर या कामगारांची मुले तशीच झोपडीवर राहात असतात. त्यांच्याकडे कोणाचेही लक्ष नसते. त्यामुळे या मुलांसाठी एखादी साखर शाळा उभारणे गरजेचे आहे.
दरम्यान, या घटनेनंतर लहान मुले शाळेत येण्यासाठी घाबरू लागली आहेत. मजूरदेखील शेतीवर कामासाठी येत नाहीत. ज्या परिसरात ही घटना घडली आहे, त्या भागातील शेतकरीदेखील शेतीवर पाणी देण्यासाठी जात नाहीत. त्यामुळे सगळीकडे भीतीचे वातावरण निर्माण झाले आहे.
स्थानिक बसले ढिम्म
मांडवगण फराटा येथील गुर्हाळावर काम करणार्या मजुराच्या मुलाचा मृत्यू या घटनेत झाला. हीच घटना जर स्थानिक रहिवासी असणार्या अन्य कोणावर घडली असती तर या भागामध्ये नक्कीच आंदोलन झाले असते. परंतु, पोटाची खळगी भरण्यासाठी आलेल्या या गुर्हाळावरील कामगाराच्या मुलाबाबत ही घटना घडल्याने स्थानिक देखील ढिम्म बसले आहेत.