कुरकुंभ: पांढरेवाडी (ता. दौंड) हद्दीत आयशर टेम्पोने दुचाकीला पाठीमागुन जबर धडक दिल्याने भीषण अपघात झाला. या अपघातात एक ठार, तर एकजण जखमी झाला. हा अपघात शनिवारी (दि. १४) सायंकाळी ६ वाजण्याच्या सुमारास घडला.
याप्रकरणी आयशर टेम्पोचालक चंद्रकांत आसराजी शेंबडे (रा. धाखंटा, ता. गेवराई, जि. बीड) याच्यावर दौंड पोलीस ठाण्यात गुन्हा दाखल करण्यात आला आहे. याबाबत स्वप्नील दत्तात्रय सुतार (वय २१, रा. मळद, ता. दौड) यांनी फिर्याद दिली आहे. भरत संतोष जाधव( रा. मळद, ता. दौड) असे मृत्युमुखी पडलेल्याचे नाव आहे.
पोलीसांनी दिलेल्या माहितीनुसार, पांढरेवाडी हद्दीतील (मुकादमवाडी) इटरनेस प्रा. लि. कंपनीचे पाठीमागील सेवा रस्त्यावर फिर्यादी व भरत जाधव दोघे दुचाकी नंबर (एमएच ४२ बीआर ९८४१) या वाहनाने मळदकडे जात होते. यादरम्यान भरधाव वेगातील आयशर (एमएच १० ईजे ९१११) टेम्पोने दुचाकीला पाठीमागुन जबर धडक दिल्याने अपघात झाला. यात भरत जाधव यांच्या डोक्याला, पोटावर, हातापायाला गंभीर व किरकोळ दुखापत होवुन त्याचा मृत्यू झाला. स्वप्नील सुतार यांना किरकोळ दुखापत झाली, तसेच दुचाकीचे नुकसान झाले.