पुणेः पोलिस आयुक्तायलयात जनसंपर्क अधिकारी म्हणून कार्यरत असलेले सहायक पोलिस फौजदार प्रवीण घाडगे यांना सेवेतून निलंबित करण्यात आले आहे. गुन्हे शाखेचे पोलिस उपायुक्त निखिल पिंगळे यांनी याबाबतचे आदेश दिले आहेत.
कामात गंभीर अनियमितता आणि पदाचा गैरवापर उघडकीस आल्यानंतर घाडगे यांना निलंबित करण्यात आले आहे. तसेच त्यांची विभागीय पातळीवर चौकशी सुरू असून, त्यानंतर सेवेतून बडतर्फीबाबत विचार होईल,' अशी माहिती पोलिस आयुक्त अमितेश कुमार यांनी सोमवारी दिली.
गोपनीय चौकशीत प्रवीण घाडगे यांनी आपल्या पदाचा तसेच पोलिस आयुक्तांच्या नावाचा वापर करून आंदेकर टोळीशी संबंधित असलेल्या व्यक्तीला लाभ मिळवून देण्याचा प्रयत्न केल्याचे निष्पन्न झाले आहे. अमितेश कुमार म्हणाले, 'प्रवीण घाडगे यांनी पुणे पोलिस आयुक्तांचे नाव वापरत सहायक पोलिस आयुक्त शंकर खटके यांच्यावर दबाव टाकण्याचा प्रयत्न केला होता. जमीन वाद प्रकरणात आंदेकर टोळीशी संबंधित असलेल्या एका व्यक्तीला मदत मिळावी, यासाठी हा दबाव टाकण्यात आला होता. मात्र, सहायक आयुक्त खटके यांनी कोणतीही मदत करण्यास स्पष्ट नकार देत हा प्रकार पोलिस उपायुक्त निखिल पिंगळे यांच्या निदर्शनास आणून दिला.
दरम्यान, जमीन वादाशी संबंधित काही पीडित तक्रार दाखल करण्यासाठी पुणे पोलिस आयुक्तालयात आले होते. मात्र, आंदेकर टोळीशी संबंधित असलेल्या त्या व्यक्तीने तक्रार दाखल होऊ नये, यासाठी पीडितांवर विविध प्रकारचा दबाव टाकल्याचा आरोप आहे. या प्रकरणात 'स्टॅनली' नावाचा व्यक्ती मध्यस्थाची भूमिका बजावत होता. तपासात स्टॅनलीचा थेट संपर्क प्रवीण घाडगे यांच्याशी असल्याचे स्पष्ट झाले आहे. तो घाडगे यांचा मित्र आहे. पोलिसांना जेव्हा ही माहिती मिळाली तेव्हा त्यांनी स्टॅनलीला ताब्यात घेऊन चौकशी केल्यावर संपूर्ण प्रकरणाचा खुलासा झाला. घाडगे यांनी प्रकरण मिटवण्यासाठी आणि तडजोड घडवून आणण्यासाठी काही लाख रुपये मागितल्याची माहिती आहे. तसेच, आंदेकर टोळीशी संबंधित व्यक्तीचे प्रकरण घेऊन स्टॅनली हा व्यक्ती प्रवीण घाडगे यांच्यापर्यंत पोहोचल्याचेही त्याने मान्य केले.'
पोलिस दलात शिस्त आणि प्रमाणिकपणात कोणतीही तडजोड नाही. एखादा कर्मचारी किंवा अधिकारी त्यांच्या प्राथमिक कर्तव्यात कसूर करेल, तर त्याला निश्र्चित कारवाईला सामोरे जावे लागेल. प्रवीण घाडगेची विभागीय चौकशी सुरू आहे. या चौकशीनंतर बडतर्फीबाबतचा निर्णय घेतला जाईल.अमितेशकुमार, पोलिस आयुक्त, पुणे