नाशिक : पुढारी वृत्तसेवा
सार्वजनिक वाहतूक व्यवस्था सक्षम करण्यासाठी सुरू झालेली स्मार्ट बससेवा तसेच प्रस्तावित निओ मेट्रोमुळे वाहतूक व्यवस्थेसंदर्भात मनपा आयुक्त तथा प्रशासक रमेश पवार यांनी नव्याने ट्रॅफिक सर्वेक्षण करण्याचे आदेश दिले आहेत. ट्रॅफिक सर्वेक्षण अहवालानंतर मायको सर्कल उड्डाणपुलाला सुधारित कार्यारंभ आदेश दिले जाणार असून, सिटी सेंटर मॉल येथील उड्डाणपुलाचीही यानिमित्ताने व्यवहार्यता तपासली जाईल.
शहराची लोकसंख्या आजमितीस 20 लाखांच्या आसपास आहे. धार्मिक आणि निसर्गसंपन्नता यामुळे दरवर्षी लाखो भाविक, पर्यटक नाशिक शहर आणि परिसराला भेटी देत असतात. मुंबई-पुणे व नाशिक या सुवर्ण त्रिकोणामुळे नाशिकलाही मोठे महत्त्व आलेले आहे. याच बाबींच्या आधारे प्रशासक पवार यांनी शहरातील सार्वजनिक वाहतूक व्यवस्था अधिक सक्षम होण्याच्या दृष्टीने पर्यटक तसेच भाविकांना सुविधा उपलब्ध करून देण्यासाठी नव्याने वाहतूक सर्वेक्षण हाती घेतले असून, निविदा प्रक्रिया राबवून सल्लागार नियुक्त करण्यात येणार आहे.
नाशिकच्या निओ मेट्रोसाठी 31 किमी लांबीचे दोन एलिव्हेडेट मार्ग तयार करण्यात आले आहेत. पहिला एलिव्हेटेड कॉरिडोर 10 किमी लांबीचा असून, त्यात गंगापूर, जलालपूर, काळेनगर, जेहान सर्कल, थत्तेनगर, शिवाजीनगर, पंचवटी, सीबीएस, मुंबई नाका अशी दहा स्थानके असतील. दुसरा कॉरिडोर गंगापूर ते नाशिकरोड असा 22 किमी लांबीचा असेल. त्यात गंगापूर गाव, शिवाजीनगर, श्रमिकनगर, एमआयडीसी, मायको सर्कल, सीबीएस, सारडा कॉर्नर, द्वारका, गांधीनगर, नेहरूनगर, दत्तमंदिर, नाशिकरोड असा आहे. सीबीएस कॉमन स्टेशन असेल. दोन फिडर कॉरिडोर असतील. सातपूर कॉलनी, गरवारे, मुंबई नाका दरम्यान पहिला फिडर तर दुसरा नाशिकरोड, नांदूर नाका, शिवाजीनगर दरम्यान चालेल.
2036 च्या लोकसंख्येचा विचार करता तब्बल 4,135 कोटी 99 लाख रुपये खर्चाचा वाहतूक आराखडा 2016 मध्ये तत्कालीन आयुक्त अभिषेक कृष्णा यांच्या उपस्थितीत सादर करण्यात आला होता. दिल्ली येथील अर्बन मास ट्रान्झिट कंपनीने वाहतूक आराखडा तयार केला होता. या आराखड्यात सार्वजनिक परिवहन व्यवस्थेच्या सक्षमीकरणावर भर देण्याबरोबरच सार्वजनिक वाहतूक धोरण, पादचारी मार्ग, सायकल ट्रॅक, रस्ता विकास, मालवाहतूक, तंत्रज्ञान व रहदारी यांचा समावेश होता.