नाशिक : पुढारी वृत्तसेवा
महिलांचे लैगिंक शोषण, विनयभंग, धर्मांतराचा प्रयत्न आणि धार्मिक भावना दुखावल्याबाबतचे प्रकरण समोर आल्याने, टीसीएस कंपनी व्यवस्थापनाने तत्काळ काही कठोर निर्णय घेतले आहेत.
या प्रकरणातील सर्व संशयितांना यापूर्वीच निलंबित करण्यात आले असून, पोलिस चौकशीमुळे इतर कर्मचाऱ्यांना वर्क फ्रॉम होम सुरू केले आहे. दरम्यान, कामकाज बंद केले जाऊ नये, अशी मागणी टाटा सन्सचे चेअरमन एन. चंद्रशेखरन यांच्याकडे भाजप गुड गव्हर्नन्स सेलचे प्रदेशाध्यक्ष प्रदीप पेशकार यांनी केली आहे.
पेशकार यांनी ई-मेलच्या माध्यमातून एन. चंद्रशेखरन यांच्याशी संपर्क साधला. त्यात त्यांनी म्हटले की, टीसीएसच्या नाशिक शाखेत घडलेला प्रकार निंदनीय आहे. मात्र, कंपनीची नाशिक स्थित शाखा एक उदयोन्मुख आयटी केंद्र असून, नाशिकमध्ये तरुणांना रोजगाराच्या दृष्टीने अत्यंत महत्त्वाचे आहे.
याशिवाय आयटी उद्योगांना आकर्षित करणारे हे केंद्र असल्याने, नाशिकच्या आयटी क्षेत्रासाठी ही शाखा नेहमीच बळ देत आली आहे. आपण संशयित कर्मचाऱ्यांवर केलेल्या कारवाईचे आम्ही कौतुक करतो. मात्र, शाखा बंद केल्यास जनतेमध्ये अनावश्यक शंका, गैरसमज निर्माण होऊ शकतात.
याशिवाय, शहराच्या आयटी परिसंस्थेवर नकारात्मक परिणाम होऊ शकतो. त्यामुळे कंपनी सुरळीत सुरू ठेवावी, अशी मागणी पेशकार यांनी केली. त्यास एन. चंद्रशेखरन यांनी प्रतिसाद देत, पाठिंबा आणि आपुलकीबद्दल आभार व्यक्त केले. तसेच चौकशी पूर्ण झाल्यानंतर वैयक्तिकरित्या भेटण्याचे आश्वासन देखील दिले. दरम्यान, नाशिकचे आयटी भविष्य सुरक्षित करण्याची गरज असून, त्यासाठी सकारात्मक पावले उचलण्यासाठी प्रयत्न करणार असल्याचेही पेशकार यांनी सांगितले.