TCS Nashik Case Updates: नाशिक येथील टाटा कन्सल्टन्सी सर्व्हिसेसच्या (TCS) BPO सेंटरमध्ये गंभीर प्रकार उघडकीस आल्यानंतर कंपनीने मोठा निर्णय घेतला आहे. लैंगिक अत्याचार, मानसिक छळ आणि जबरदस्ती धर्मांतराच्या आरोपांमुळे हे सेंटर तात्पुरते बंद करण्यात आले असून कर्मचाऱ्यांना ‘वर्क फ्रॉम होम’ करण्याचे निर्देश देण्यात आले आहेत.
या प्रकरणात आतापर्यंत किमान 8 महिला कर्मचाऱ्यांनी पुढे येत गंभीर आरोप केले आहेत.
त्यांच्या मते, अनेक वर्षांपासून ऑफिसमध्ये लैंगिक छळ, मानसिक त्रास आणि धार्मिक दबाव टाकला जात होता. काही महिलांनी तर जबरदस्तीने विशिष्ट अन्न खाण्यास आणि धार्मिक प्रथांमध्ये सहभागी होण्यास भाग पाडल्याचा आरोपही केला आहे.
नाशिकचे पोलीस आयुक्त संदीप कर्णिक यांनी दिलेल्या माहितीनुसार, या प्रकरणात 7 पुरुष आरोपी एकत्रितपणे ‘गट’ म्हणून काम करत होते. हे आरोपी ऑफिसमधील महिलांना लक्ष्य करत असल्याचा संशय तपासातून समोर आला आहे.
या प्रकरणात आतापर्यंत:
9 FIR दाखल
8 आरोपींना अटक (7 पुरुष, 1 महिला)
आणखी एक महिला आरोपी फरार झाली आहे
अटक करण्यात आलेल्यांमध्ये काही जण टीम लीड पदावर होते, ज्यांनी आपल्या पदाचा गैरवापर केल्याचा आरोप आहे.
या प्रकरणात एका HR अधिकाऱ्यावरही गंभीर आरोप करण्यात आले आहेत. तिने पीडितेला तक्रार न करण्याचा सल्ला दिला आणि आरोपींचे समर्थन केल्याचे समोर आले आहे.
या प्रकरणाची गंभीरता लक्षात घेता, पोलीसांनी National Investigation Agency (NIA), ATS आणि State Intelligence Department यांच्याशी संपर्क साधला आहे. या प्रकरणामागे मोठं जाळं किंवा आर्थिक व्यवहार आहे का, याचाही तपास सुरू आहे.
पहिल्या पीडितेने सुरुवातीला तक्रार देण्यास संकोच केला होता. पण पोलिसांच्या मदतीनंतर इतर महिलाही पुढे आल्या आणि प्रकरण उघडकीस आलं. महिला पोलिस अधिकारी आणि कर्मचारी यांना ऑफिसमध्ये तैनात करण्यात आलं आहे, जेणेकरून पीडित महिलांना सुरक्षित वातावरण मिळेल.
या प्रकरणाची गंभीर दखल घेत National Commission for Women (NCW) ने स्वतःहून तपास सुरू केला आहे. 18 एप्रिल रोजी समिती प्रत्यक्ष ठिकाणी जाऊन चौकशी करणार आहे.