नाशिक : पुढारी वृत्तसेवा
जगभरात खळबळ उडवून देणाऱ्या एपस्टीन फाइल्समध्ये केंद्र सरकारमधील मंत्र्यांचे नाव आल्याने, जिल्हा युवक काँग्रेसच्या वतीने आंदोलन करीत निषेध व्यक्त करण्यात आला. महात्मा गांधी रोडवरील काँग्रेस भवन येथे दुपारी २ च्या सुमारास आंदोलन करण्यात आले.
जिल्हा युवक काँग्रेस अध्यक्ष गौरव पानगव्हाणे यांच्या नेतृत्वाखाली करण्यात आलेल्या या आंदोलनात, 'जेफ्री एपस्टाइन कोण आहे?, एक हाय प्रोफाइल सेक्स रॅकेट चालविणारा माणूस आहे.
जो करोडपती, अब्जाधीश लोकांना सेवा उपलब्ध करून देतो. लहान मुलांचे शोषण करतो. अशा व्यक्तीबरोबरच जर केंद्र सरकारमधील मंत्र्यांचे नाव जोडले जात असेल तर ते नक्कीच शोभनीय नाही.
त्यामुळे पंतप्रधान मोदी यांनी याप्रकरणी पत्रकार परिषद घेऊन देशासमोर सत्य मांडावे अशी मागणी यावेळी आंदोलकांकडून करण्यात आली. तसेच मंत्री हरदीप पुरी यांचा राजीनामा घ्यावा, अशीही मागणी केली गेली.
यावेळी युवक काँग्रेसचे सचिव स्वप्निल पाटील, सरचिटणीस राहुल मोरे, जिल्हा सचिव हर्षल देशमुख, सौरभ पगारे, निफाड विधानसभाध्यक्ष सचिन खडताळे, येवला विधानसभाध्यक्ष अक्षय शिंदे, इगतपुरी अध्यक्ष गणेश मेधने, देवळाली विधानसभाध्यक्ष हेमंत पवार, ओझर शहर युवक काँग्रेस अध्यक्ष कृष्णा सोनवणे, प्रशांत बोलणीस, तौसिफ राजे, हिरेन फोडल आदी उपस्थित होते.