Married Woman Murder Nashik
नाशिक : वाडीवऱ्हे परिसरातील सांजेगाव येथे प्रेमसंबंधातून झालेल्या हत्येच्या घटनेने खळबळ उडाली आहे. हॉटेल मिरची रिसॉर्टच्या गेटजवळ रूपाली पाटील यांचा मृत्यू झाला. या प्रकरणी त्यांचा प्रियकर दीपक सैंदाणे याला वाडीवऱ्हे पोलिसांनी अटक केली असून, पुढील तपास सुरू आहे.
मिळालेल्या माहितीनुसार, रूपाली पाटील आणि दीपक सैंदाणे हे दोघेही विवाहित असून, गेल्या दोन ते तीन वर्षांपासून त्यांच्यात प्रेमसंबंध होते. मंगळवारी दोघे कारमधून वाडीवऱ्हे परिसरात गेले होते. यावेळी कारमध्ये दोघांमध्ये काही कारणावरून वाद झाला.
वाद वाढल्यानंतर रूपाली कारमधून खाली उतरल्या. यावेळी संतापलेल्या दीपकने त्यांच्या अंगावर कार घातल्याचा आरोप आहे. कारची धडक बसल्याने रूपाली गंभीर जखमी झाल्या. त्यानंतर कार रिसॉर्टच्या लोखंडी गेटवर जाऊन आदळली.
घटनेनंतर सुरुवातीला हा अपघात असल्याचे वाटत होते. मात्र, पोलिसांना संशय आल्याने त्यांनी तपासाची दिशा बदलून घटनेची चौकशी केली. तपासादरम्यान धक्कादायक बाबी समोर आल्यानंतर पोलिसांनी दीपक सैंदाणे याला ताब्यात घेऊन अटक केली.
या घटनेमागील नेमके कारण, दोघांमध्ये झालेल्या वादाचे स्वरूप आणि हत्येचा घटनाक्रम याबाबत वाडीवऱ्हे पोलिसांकडून पुढील तपास सुरू आहे.