Nashik Cidco News : सिडको प्रकल्पबाधितांचा लढा कायम

सिडको (नाशिक) : सिडको महामंडळाने नवीन नाशिक सिडको गृहप्रकल्प राबवला. मात्र, या प्रकल्पात शेकडो भूमिपुत्रांच्या जमिनी गेल्या. त्यांना योग्य मोबदला मिळाला नाही. जो मिळाला, तो तुटपुंजा होता. त्यामुळे नाशिक प्रकल्पात ९५ टक्के भूमिपुत्र प्रकल्पबाधित झालेले आहेत. बहुतांश प्रकल्पग्रस्त शेतकऱ्यांच्या घरातील दुसरी किंवा तिसरी पिढी मोबदला मिळण्यासाठी लढा देत आहे.

सिडको महामंडळाने त्यांचा विचार करावयास हवा होता. परंतु, जमिनी घेतल्यानंतर तुटपुंजा मोबदला देत त्यांना प्रकल्पापासून बाजूला ठेवण्यात आले. काही जमिनीचा हिस्सा राखीव ठेवून त्यांना विकसित करता आले असते, असे शासनाचे व महामंडळाचे इतर ठिकाणी धोरण आहे. परंतु, नाशिक प्रकल्पात ते दिसून आलेले नाही. त्यामुळे खरे भूमिपुत्र अधिकारापासून वंचित राहिले. ९५ टक्के प्रकल्पग्रस्त बाधित असून, त्यांना जीवनाचा गाडा हाकताना अनेक समस्यांना सामोरे जावे लागत आहे. प्रकल्पग्रस्तांपैकी ५ टक्के सधन झालेले सुस्थितीत दिसतात. मात्र, ते वरवरचे चित्र आहे. मोबदल्यासाठी तिसरी पिढी संघर्ष करत आहे. महामंडळाने त्यांना न्याय देण्यासाठी योग्य ती तजवीज करावी, अशी मागणी नागरिक संघर्ष समितीचे अध्यक्ष गणेश पवार, धनंजय बुचडे, दशरथ गांगुर्डे, नंदन खरे, जालिंदर आवारी, भगवंता अहिरे, अण्णा तांबे, वसंतराव सोनवणे, रावसाहेब पाटील, समाधान शेवाळे, राहुल भापकर, काशीनाथ दिंडे यांनी केली.