नगर: गंज बाजार, सर्जेपूरातील रंगभवन, सिध्दीबाग, प्रोफेसर चौक, सावित्रीबाई फुले फेज 1 व फेज 2, भाग्योदय बालाजी कॉलनी व्यापारी संकुलातील थकबाकीदार गाळेधारकांना जप्ती कारवाईच्या नोटीसा बजावल्यानंतर आता मध्य शहरातील बाजारपेठेत असलेल्या जुना दाणे डबरातील 52 गाळेधारकांवर कारवाई सुरू केली आहे. या गाळेधारकांकडे 2 कोटी 7 लाखांची थकबाकी असून, त्याच्या वसुलीसाठी सर्वांना जप्तीच्या नोटीसा बजावल्या आहेत.
संपूर्ण थकबाकी तत्काळ न भरल्यास गाळे जप्त करून ताब्यात घेतले जातील, असा इशारा आयुक्त तथा प्रशासक यशवंत डांगे यांनी दिला आहे. शहरातील गाळेधारकांकडे महापालिकेची सुमारे 25 कोटींची थकबाकी आहे. मार्च महिन्यात महानगरपालिकेने थकबाकीदारांना थकीत रक्कम भरण्यासाठी नोटीसा बजावल्या होत्या. (Latest Ahilyanagar News)
त्यानंतर शहरातील सर्व गाळे, खुल्या जागा, वर्ग खोल्या आदींचा सर्वे मार्केट विभागाकडून करण्यात आला. थकबाकी वसुलीसाठी महानगरपालिकेने सर्वच गाळेधारकांवर कारवाई सुरू केली आहे. सर्व थकबाकीदार गाळेधारकांना जप्ती कारवाईच्या नोटीसा बजावण्यात आल्या आहेत.
दाणे डबरातील गाळेधारकांचे बहुतांश करारनामेही संपुष्टात आलेले आहेत. थकबाकीदार गाळेधारकांना वारंवार सूचना देऊनही त्यांनी थकीत भाडे न भरल्यामुळे या थकबाकीदारांना महाराष्ट्र महानगरपालिका अधिनियम कलम 81(ब) नुसार जप्ती कारवाईच्या नोटीसा बजावण्यात आल्या आहेत.
रंगभवन व केडगावकरांनी भरली थकबाकी
रंगभवन व्यापारी संकुलातील गाळेधारकांवर कारवाई सुरू करताच गाळेधारकांनी 48 लाख 96 हजार रुपये जमा केल्याने त्यांची कारवाई टळली. केडगावच्या भाग्योदय व्यापारी संकुलातील व्यापार्यांनीही काही रक्कम जमा केल्याने तूर्तास कारवाई टळली आहे. थकबाकी वसुलीसाठी महानगरपालिकेची कठोर कारवाई सुरू आहे. त्यामुळे गाळेधारकांनी थकबाकी भरून कारवाई टाळावी, असे आवाहन आयुक्त तथा प्रशासक यशवंत डांगे यांनी केले आहे.