नगर: राहाता पोलिस ठाण्यातील फसवणुकीच्या गुन्ह्यात भोंदू अशोक खरातला ताब्यात घेतल्यानंतर शनिवारी राहाता न्यायालयात हजर करण्यात आले. न्यायालयाने त्याला सात दिवसांची पोलिस कोठडी सुनावली आहे.
मुबंईतील दिनेश परब यांनी राहाता पोलिसात दिलेल्या फसणुकीच्या गुन्ह्यात खरातला वर्ग करण्यात आले आहे. गोकर्ण-महाबळेश्वर येथे ट्रिपला जायचे सांगत खरातने परब यांचे आधार कार्ड, फोटो घेतले होते. त्याचा वापर करून पतसंस्थेत खाते उघडले अन् १ कोटीचे व्यवहार केल्याचा आरोप आहे. पतसंस्थेतील सुमारे १०८ खात्यांना खरात हा नॉमिनी असल्याचे पोलिस तपासात समोर आल्यानंतर पोलिस आता त्याचा उलगडा करणार असल्याचे समजते.
शिर्डीतील रावसाहेब गोंदकर यांनीही जमीन खरेदी-विक्री व्यवहारात फसवणूक केल्याचा गुन्हा अशोक खरात विरोधात नोंदविण्यात आला आहे. एसआयटीने शुक्रवारी खरातला शिर्डीच्या गुन्ह्यात अटक केली. शनिवारी न्यायालयात एसआयटीचे तपास अधिकारी अमोल भारती, सरकारी वकिल अभिषेक नागरे यांनी बाजू मांडली. खरातच्यावतीने ॲड. व्यंकटेश खिस्ते यांनी युक्तीवाद केला.
खरातने कोट्यवधींचे व्यवहार केले असून हा पैसा कोठून आला?, व्यवहारातील लाभार्थी कोण? आणि त्यासाठी त्याला कोणी कोणी मदत केली? याचा तपास करण्यासाठी सरकार पक्षातर्फे पोलिस कोठडीची मागणी करण्यात आली.
पतसंस्थेतील खाते उघडण्यासाठी खातेदारांनीच कागदपत्रे दिली, कागदपत्रांचा गैरवापर झाल्याचा दावा आधारहिन असल्याचा बचावात्मक युक्तीवाद खरातच्यावतीने ॲड. खिस्ते यांनी केला.