नगर: अवैध धंद्यांविरुद्ध सुरू असलेल्या धडक मोहिमेचा भाग म्हणून स्थानिक गुन्हे शाखेने भिंगार कॅम्प पोलिस ठाण्याच्या हद्दीत जुगार अड्ड्यावर छापा घातला. या कारवाईत पोलिसांनी ७ जणांना ताब्यात घेतले असून, रोख रकमेसह एकूण १ लाख ६७ हजार ५०० रुपयांचा मुद्देमाल जप्त केला.
पोलिस अधीक्षक मुम्मका सुदर्शन यांनी जिल्ह्यातील अवैध धंद्यांचे समूळ उच्चाटन करण्याचे आदेश दिले आहेत. त्यानुसार स्थानिक गुन्हे शाखेचे पोलिस निरीक्षक संतोष मुटकुळे यांच्या मार्गदर्शनाखाली पोलिस अंमलदार अरविंद भिंगारदिवे, सुनील पवार, पंकज व्यवहारे, योगेश भिंगारदिवे व योगेश कर्डिले यांच्या विशेष पथकाची स्थापना करण्यात आली होती.
१३ जुलै रोजी स्थानिक गुन्हे शाखेचे पथक भिंगार कॅम्प पोलिस ठाण्याच्या हद्दीत गस्त घालत असताना त्यांना गोपनीय माहिती मिळाली की, सोलापूर रोड लगत असलेल्या सारसनगर येथील हॉटेल 'आरवी'च्या बाजूला, एका चालू बांधकामाच्या आडोशाला काही व्यक्ती जुगार खेळत आहेत.
त्यानुसार पथकाने घटनास्थळी जाऊन खात्री केली असता, काही व्यक्ती बांधकामाच्या आडोशाचा फायदा घेऊन जुगार खेळत होते. पोलिसांनी छापा घालून सात जणांना रंगेहाथ पकडले.
बाबासाहेब बेरड (वय ५६, रा. दरेवाडी, ता. जि. अहिल्यानगर), संजय प्रभाकर तडके (वय ६२, रा. कोठी स्टेशन रोड, अहिल्यानगर), भास्कर जगधने (वय ६२, रा. सोलापूर रोड, अहिल्यानगर), संजय भिंगारदिवे (वय ५४, रा. दरेवाडी, ता. जि. अहिल्यानगर), सुधीर शिंदे (वय ५५, रा. स्टेशन रोड, अहिल्यानगर), महादेव कराळे (वय ४६, रा. आगडगाव, ता. जि. अहिल्यानगर), राजू भिवा मोरे (वय ५३, रा. आदर्शनगर, श्रीरामपूर) असे ताब्यात घेतल्यांची नावे आहेत. त्यांच्याकडून जुगाराचे साहित्य, रोख रक्कम, मोबाईल असा १ लाख ६७ हजारांचा मुद्देमाल हस्तगत केला. याप्रकरणी भिंगार कॅम्प पोलिस ठाण्यात गुन्हा दाखल करण्यात आला आहे.