Tiger Shroff Juhu Firing Incident: अभिनेता टायगर श्रॉफच्या गाडीवर मुंबईतील जुहू परिसरात गोळीबार झाल्याची घटना समोर आली आहे. या घटनेमुळे परिसरात खळबळ उडाली असून, अभिनेता टायगर श्रॉफ, त्याचा गाडी चालक आणि एक रिक्षाचालक जखमी झाल्याची माहिती आहे. या हल्ल्यातून टायगर श्रॉफ थोडक्यात बचावला असून, सध्या तो सुरक्षित असल्याची माहिती देण्यात आली आहे. या घटनेनंतर उपमुख्यमंत्री एकनाथ शिंदे यांनी टायगरच्या घरी जाऊन त्याची भेट घेतली आणि त्याच्या प्रकृतीची विचारपूस केली.
एकनाथ शिंदे यांनी टायगर श्रॉफची भेट घेतल्यानंतर या भेटीचे काही फोटो समोर आले आहेत. या फोटोंमध्ये टायगरच्या हातावर पट्टी बांधलेली दिसत आहे. तसेच त्याच्या खांद्यावर आणि छातीच्या भागातही मलमपट्टी केल्याचे दिसून येत आहे. गोळीबारादरम्यान झालेल्या घटनेत गाडीच्या काचांचे तुकडे आणि इतर वस्तूंमुळे त्याच्या डाव्या हाताला दुखापत झाल्याचे एकनाथ शिंदे यांनी सांगितले.
या घटनेमुळे टायगर श्रॉफ आणि त्याचे कुटुंब चिंतेत असल्याचेही त्यांनी नमूद केले. राज्य सरकार त्याच्या पाठीशी ठामपणे उभे असल्याचे आश्वासन शिंदे यांनी दिले.
टायगर श्रॉफची भेट घेतल्यानंतर पत्रकारांशी बोलताना एकनाथ शिंदे यांनी या घटनेचा निषेध केला. या प्रकरणात पाच राऊंड गोळीबार झाल्याची माहिती त्यांनी दिली. सुदैवाने टायगर सुरक्षित असून, त्याच्या चालकाला दुखापत झाली आहे, असेही त्यांनी सांगितले.
मुंबईत कोणत्याही टोळीला किंवा व्यक्तीला दहशत निर्माण करण्याची परवानगी दिली जाणार नाही. गुंडगिरी करणाऱ्यांविरोधात कठोर कारवाई केली जाईल, असा इशाराही त्यांनी दिला. राज्यातून गुंडगिरी संपवण्यासाठी सरकार आवश्यक ती पावले उचलेल, असे आश्वासन त्यांनी टायगर आणि त्याच्या कुटुंबाला दिले.
मुंबईत पुन्हा टोळीयुद्धाचे वातावरण निर्माण होऊ दिले जाणार नाही, असे एकनाथ शिंदे यांनी स्पष्ट केले. १९९० च्या दशकात मुंबईतील टोळीयुद्धांवर नियंत्रण मिळवण्यात आले होते. आता पुन्हा अशा घटना घडू दिल्या जाणार नाहीत, असेही त्यांनी सांगितले.
मुख्यमंत्री देवेंद्र फडणवीस यांनीदेखील या घटनेची गंभीर दखल घेतली असल्याची माहिती शिंदे यांनी दिली. पोलीस आणि राज्य सरकार या प्रकरणातील दोषींवर कठोर कारवाई करतील, असे त्यांनी स्पष्ट केले.
तसेच, कोणत्याही कलाकाराला धमकीचे फोन आल्यास किंवा संशयास्पद प्रकार घडल्यास त्यांनी तातडीने पोलिसांना माहिती द्यावी, असे आवाहनही एकनाथ शिंदे यांनी केले. दरम्यान, मुख्यमंत्री देवेंद्र फडणवीस यांनीही टायगर श्रॉफशी संवाद साधल्याची माहिती समोर आली आहे.