हार्बर मार्गावरील प्रवाशांकरिता आनंदाची बातमी आहे. हार्बर मार्गावरील टिळकनगर ते पनवेलदरम्यान लोकल 80 किमी प्रतितासवरून 95 किमी प्रतितास धावत आहे. यामुळे सीएसएमटी ते पनवेलदरम्यान प्रवासाचा वेळ 2 ते 3 मिनिटांनी कमी झाला आहे.
सीएसएमटी ते पनवेलदरम्यानचा प्रवास काहीसा वेगवान झाला आहे. सध्या सीएसएमटी ते पनवेलदरम्यान सध्या ताशी 80 किमी वेगाने लोकल धावतात. या वेगाने सीएसएमटी ते पनवेल अंतर पार करण्यासाठी 80 मिनिटे म्हणजेच एक तास 20 मिनिटे लागतात.
हार्बर मार्गावरील प्रवाशांचा प्रवास वेळ वाचवण्यासाठी लोकलचा वेग वाढविण्याचा निर्णय मध्य रेल्वेने गेल्या वर्षी घेतला होता. त्यानुसार आता हार्बर मार्गावरील लोकलचा वेग वाढविण्यात आला आहे.
हार्बर मार्गावर सीएसएमटी ते पनवेल 188 आणि सीएसएमटी ते बेलापूर 79 लोकलच्या फेर्‍या दिवसभरात होतात.यातून सुमारे 20 ते 25 लाख प्रवासी प्रवास करतात.
हार्बर मार्गावर सकाळी आणि संध्याकाळी पीक अवरच्या वेळी लोकलला प्रचंड गर्दी असते. परंतु हार्बर मार्गावर केवळ धीम्या मार्गावरील लोकल धावतात.त्यामुळे गाड्यांना गर्दी असते. त्यातच हार्बर मार्गावरील गाड्यांचा वेग कमी असल्याने प्रवाशांना नेहमीच लेटमार्क लागतो. यामुळे हार्बर मार्गावरील वेग वाढविण्याचा निर्णय मध्य रेल्वेने घेतला होता.
सीएसएमटी-टिळकनगर दरम्यानच्या दर दोन स्थानकांमधील अंतर 1 ते 2 किमी आहे. त्यामुळे प्रत्येक स्थानकात लोकल थांबवून पुन्हा वेग कमी-जास्त करावा लागतो. मात्र टिळकनगर स्थानकानंतर दोन स्थानकांतील अंतर वाढते. त्यामुळे टिळकनगर ते पनवेल या 32.53 किमी मार्गात लोकलचा वेग वाढविला आहे.