मुंबई : मुंबईत तब्बल एक कोटी रुपये किमतीचा फ्लॅट, स्वत:ची ऑडी कार, सतत विमानाने प्रवास, मोठमोठ्या हॉटेलांत मुक्काम करणारा एखादा व्यक्ती चोर असू शकेल, यावर सहसा कुणी विश्वास ठेवणार नाही; पण हे वास्तवात घडले असून, अशा या श्रीमंत चोराला नुकतेच गुजरात पोलिसांनी वापीमध्ये बेड्या ठोकल्या आहेत.
रोहित कनुभाई सोलंकी असे या चोराचे नाव आहे. विविध राज्यांतील चोरी आणि दरोड्यांच्या घटनांचा तपास करताना तो गुजरातच्या वलसाड पोलिसांच्या तावडीत सापडला. गेल्या महिन्यात वापी येथे एक लाख रुपयांच्या चोरीप्रकरणी पोलिसांनी त्याला ताब्यात घेतले. नंतर चौकशीत त्याने या चोरीसह एकूण 19 दरोडे घातल्याची कबुली देतानाच आपली आलिशान जीवनशैलीही कथन केली. त्याचे राहणीमान ऐकून पोलिसांनीही बोटे तोंडात घातली.
रोहितने एका मुस्लिम युवतीशी लग्न केले होते. त्यासाठी रोहितने आपले नाव बदलून अरहान ठेवले होते. एवढेच नाही, तर तो मुंबईतील डान्स बार आणि नाईट क्लबमध्ये पार्ट्यांचाही आनंद लुटायचा. त्याला ड्रग्जचेही व्यसन असून, यासाठी तो महिन्याला तब्बल 1.50 लाख रुपये उधळायचा. रोहितने विविध राज्यांत मिळून एकूण 19 दरोडे घातले. यात वलसाडमधील तीन, सुरतेत एक, पोरबंदर एक, सेलवाल एक, तेलंगणा दोन, आंध्र प्रदेश दोन, मध्य प्रदेश दोन आणि महाराष्ट्रातील एकाचा समावेश आहे.
रोहितने पोलिसांना दिलेल्या माहितीनुसार, तो मुंब्रा परिसरात 1 कोटी रुपयांपेक्षा जास्त किमतीच्या भव्य फ्लॅटमध्ये राहत होता. त्याच्याकडे स्वत:ची महागडी ऑडी कारही आहे. चोरी करण्याआधी रोहित विमानाने विविध राज्यांत जायचा. तेथे मोठ्या शहरांत जाऊन कॅबने प्रवास करायचा. आलिशान हॉटेलांत त्याचा मुक्काम असायचा. चोरीची योजना आखण्याआधी शहरातील विविध सोसायट्यांची रेकी करायचा.