Crime News | पनवेलच्या तरुणीने जीवन संपविले, नाशिकच्या प्रियकराला अटक

पनवेल : नाशिक येथे राहणार्‍या तरुणाने, पनवेल येथील 27 वर्षीय तरुणीसोबत 9 वर्षे प्रेमसंबंध आणि वेळोवेळी तिच्यासोबत शारीरिक संबध ठेवत अचानकपणे तिच्याशी लग्न करण्यास नकार दिल्याने मानसिक तणावाखाली आलेल्या सदर तरुणीने राहत्या घरात जीवन संपविल्याची घटना उघडकीस आली आहे. या घटनेनंतर पनवेल शहर पोलिसांनी आरोपी तरुण विजय प्रकाश गोरे (28) याच्या विरोधात आत्महत्येस प्रवृत्त केल्याप्रकरणी गुन्हा दाखल केला आहे.

विजयचा लग्नाला स्पष्ट नकार

या दोघांच्या लग्नास तरुणीच्या आई- वडिलांनीही होकार दिला होता. गेल्या 9 वर्षापासून या दोघांमध्ये प्रेमसंबंध सुरु होते. त्यानंतर मे महिन्यामध्ये विजयने त्याच्या आई-वडिलांचा त्यांच्या लग्नास विरोध असल्याचे तसेच त्यांनी दुसर्या मुलीसोबत त्याचे लग्न करण्याची तयारी सुरु केल्याचे प्रेयसीला सांगून लग्नास नकार दिला होता. त्यानंतर सदर तरुणीने आपल्या बहिणींसह नाशिक येथे जाऊन विजय गोरे याची भेट घेऊन त्याला लग्न न करण्यामागचे कारण विचारले होते. त्यावेळी विजय गोरे याने वेगवेगळी कारणे सांगून तिच्यासोबत लग्न करण्यास स्पष्ट नकार दिला होता. त्यानंतर या तरुणीने पनवेल शहर पोलीस ठाण्यात त्याच्या विरोधात तक्रार दाखल केली होती.

अन् तरुणीने उचलले टोकाचे पाऊल

सदर तक्रारीच्या अनुषंगाने पोलिसांनी विजय गोरे याला चौकशीसाठी बोलावून घेतले होते. मात्र, तो पोलीस ठाण्यात सुध्दा हजर झाला नाही. त्यानंतर खचलेल्या या तरुणीने कामावर जाणे सुध्दा बंद केल्याने ती मानसिक तणावाखाली आली होती. याच मानसिक तणावातून या तरुणीने 23 जून रोजी दुपारी घरामध्ये कुणीही नसताना बेडरुममध्ये गळफास घेऊन जीवन संपविले.

तरुणीने लिहल्या 3 चिठ्ठ्या

यावेळी तरुणीने जीवन संपविण्यापूर्वी आपल्या 2 बहिणींसाठी तसेच विजय गोरे याच्यासाठी अशा 3 चिठ्ठ्या लिहून ठेवल्याचे आढळून आले. विजय गोरे याच्यासाठी लिहिलेल्या चिठ्ठीमध्ये तरुणीने अनेक गोष्टी लिहून ठेवल्याचे आढळून आले. यावरुन विजय गोरे याने दिलेल्या मानसिक त्रासामुळे सदर तरुणीने आत्महत्या केल्याचे आढळून आल्यानंतर तिच्या कुटुंबीयांनी पनवेल शहर पोलीस ठाण्यात विजय गोरे याच्या विरोधात तक्रार दाखल केली. या तक्रारीच्या आधारे वपोनि नितीन ठाकरे यांच्या मार्गदर्शनाखाली पोलीस उपनिरीक्षक अंकुर शेलार व पो.हवा.परेश म्हात्रे यांनी गुप्तबातमीदाराद्वारे व तांत्रिक तपासाच्या आधारे सदर आरोपीचा शोध घेवून त्याला ताब्यात घेतले आहे. व पुढील कायदेशीर प्रक्रिया सुरू करण्यात आली आहे.