नवी मुंबई: नवी मुंबई पोलीस आयुक्तालयात जूनच्या पहिल्या आठवड्यात सुमारे 700 हून अधिक पोलिसांच्या सार्वत्रिक बदल्या होण्याची शक्यता आहे. एप्रिलमध्ये याबाबत पसंतीची तीन ठिकाणे कर्मचाऱ्यांनी बदलीच्या अर्जात नमूद करण्याचे निर्देश पोलीस आयुक्तांना दिले आहेत. त्यामुळे येत्या मे अखेर किंवा जूनच्या पहिल्या आठवड्यात पोलीस कर्मचाऱ्यांच्या सार्वत्रिक बदल्या होतील.
या बदली प्रक्रियेत सहायक पोलीस उपनिरीक्षक ते पोलीस शिपाई पदांच्या कर्मचाऱ्यांचा समावेश आहे. एकाच पोलीस ठाण्यात पाच वर्षे पूर्ण केलेल्या कर्मचाऱ्यांसह विनंती बदलीसाठी अर्ज केलेल्या कर्मचाऱ्यांचाही प्रक्रियेत समावेश असणार आहे.
नवी मुंबई पोलीस आस्थापना मंडळाने घेतलेल्या निर्णयानुसार या बदल्या केल्या जाणार आहेत. पोलीस आयुक्तांनी बदलीसाठी पात्र असलेल्या कर्मचाऱ्यांकडून तीन पसंतीच्या ठिकाणांसह अर्ज एप्रिलच्या पहिल्या आठवड्यात मागवले आहेत. त्यानुसार पोलीस उपायुक्त मुख्यालयाकडून आलेल्या अर्जांची छाननी आणि पात्र कर्मचाऱ्यांची यादी तयार करण्याचे काम सुरु आहे.
एप्रिलपासून या बदली प्रक्रियेला सुरूवात झाली. अखेर सर्व कर्मचांऱ्याचे सेवा पुस्तक तपासणीअंती पाच वर्षे कालावधी पूर्ण केलेले कर्मचारी, विनंती अर्ज केलेले कर्मचारी आणि मोटार वाहन विभागातील कर्मचाऱ्यांची यादी मेच्या हिल्या आठवड्यात तयार केली जाणार आहे.
त्यानंतर आस्थापना मंडळाच्या बैठकीत बदलीसाठी पात्र असलेल्या कर्मचाऱ्यांची यादी मंजुरीला घेतली जाणार आहे. त्यानंतर पोलीस आयुक्तलयातील आस्थापना मंडळाच्या निर्णयानुसार या बदल्या मे अखेर किंवा जूनच्या पहिल्या आठवड्यात अपेक्षित आहेत.
पोलीस ठाणे, नियंत्रण कक्ष, पोलीस मुख्यालय, अतिक्रमण, अंमली विरोधी शाखा, वाहतूक शाखा, गुन्हे शाखा, आरबीआय, अतिक्रमण, मोटार वाहन विभाग आणि विशेष शाखेत कालावधी पूर्ण केलेल्या पोलिसांचा बदली प्रक्रियेत समावेश आहे.