नवी मुंबई: दिवाळी सण जवळ आल्याने नवी मुंबईतील वाशी, ऐरोली, घणसोली, नेरूळ व सीबीडी बेलापूर येथील बाजारपेठांमध्ये उत्साहाचे वातावरण निर्माण झाले आहे. दिवाळीच्या स्वागतासाठी घरोघरी सजावटीची तयारी सुरू असून बाजारपेठांमध्ये विविध आकारांचे आणि आकर्षक रंगसंगतीचे आकाशकंदील विक्रीसाठी दाखल झाले आहेत.
यंदा २०० रुपयांपासून अडीच हजार रुपयांपर्यंत आकाशकंदिलांचे दर असल्याने ग्राहकांना आपल्या आवडीनुसार आणि बजेटनुसार खरेदी करता येत आहेत.
शहरातील प्रमुख बाजारपेठांमधील दुकानांमध्ये रंगीबेरंगी आकाशकंदिलांची आकर्षक मांडणी करण्यात आली आहे. पारंपरिक कागदी कंदिलांसोबतच कापडी, बांबूच्या पट्ट्यांपासून तयार केलेले, ताराकृती, गोलाकार, चौकोनी व बहुरंगी आकाशकंदील ग्राहकांचे लक्ष वेधून घेत आहेत.
कमळाच्या आकारातील, मोराच्या रचनेतील, राजवाड्याच्या प्रतिकृतीसारखे तसेच आकर्षक नक्षीकाम आणि सजावटीच्या झालरी असलेले कंदील यंदा बाजारात उपलब्ध आहेत. कंदिलांच्या आकारानुसार, वापरलेल्या साहित्याप्रमाणे व सजावटीच्या प्रकारानुसार त्यांच्या किमतीत फरक आहे.
साधे कागदी आकाशकंदील २०० ते ४०० रुपयांमध्ये उपलब्ध आहेत. मध्यम आकाराचे व अधिक आकर्षक सजावट असलेले कंदील ५०० ते १,००० रुपयांपर्यंत मिळत आहेत. तर मोठ्या आकाराचे, कलात्मक नक्षीकाम केलेले व विशेष सजावट असलेल्या आकाशकंदिलांसाठी १,२०० ते २,५०० रुपये मोजावे लागत आहेत. हे दर कंदिलाच्या प्रकारानुसार बदलतात.
दिवाळीच्या पार्श्वभूमीवर घर, सोसायट्या आणि दुकाने सजवण्यासाठी आकाशकंदिलांची खरेदी केली जाते. पारंपरिक कंदिलांसोबतच आधुनिक रचनेच्या कंदिलांनाही ग्राहक पसंती देत आहेत. दिवाळी जसजशी जवळ येत आहे, तसतशी बाजारपेठांमधील लगबग वाढणार असून आकाशकंदिलांच्या विक्रीतही तेजीची अपेक्षा व्यापाऱ्यांकडून व्यक्त केली जात आहे.