मुंबई : दिवाळीनिमित्त मुंबईतील डबेवाले सोमवार (दि.20)पासून 5 दिवसांच्या रजेवर जाणार आहेत. डबेवाले यांची ही सेवा 25 ऑक्टोबर 2025 पर्यंत तात्पुरती बंद राहणार आहे.
बहुतांश डबेवाले पुणे जिल्ह्यातील मावळ भागातील आहेत.अनेकांनी दिवाळी निमित्त गावी जाण्याचा बेत आखला आहे तर अनेकजण मुंबईत राहूनच दिवाळी साजरी करणार आहेत.दरवर्षी गावची यात्रा, पंढरपूरची वारी व अधूनमधून मोजक्या सणाच्या दिवशी ते सुटी घेतात. यंदा दिवाळीनिमित्त डबेवाल्यांनी पाच दिवसांची सुटी घेतल्याने कार्यालयातील कर्मचाऱ्यांची गैरसोय होणार आहे.
जेवण डबे पोहोचवण्याची सेवा 20 ते 25 ऑक्टोबर या कालावधीत बंद राहणार आहे.या पाच दिवसांपैकी दोन दिवस सार्वजनिक सुट्टी आहे. दिवसाच्या रजेचा पगार कापून घेऊ नये. 27 ऑक्टोबरपासून डबेवाल्यांची सेवा नियमितपणे सुरू होईल.दिवाळी बोनस म्हणून एक जादा पगार द्यावा व तो ऑक्टोबरच्या पगारात देण्याची मागणी मुंबई डबेवाला असोसिएशन अध्यक्ष उल्हास मुके यांनी केली आहे.