मुंबई : ऐन दिवाळीच्या तोंडावर एसटीने गावी जाणाऱ्या प्रवाशांना नाहक त्रास सहन करावा लागत असल्याचं दिसून येत आहे. एसटी आरक्षण प्रणाली ठप्प झाल्याने प्रवास कसा करायचा, असा प्रश्न आता पडला आहे. आरक्षण प्रणाली ठप्प झाल्याचा फटका प्रवाशांसह एसटी महामंडळालाही बसत असल्याचं चित्र आहे. तसेच नवीन प्रणालीमुळे कर्मचारीही वैतागले आहेत.
एसटी आरक्षण प्रणाली सॉफ्टवेअर आणि कंपनीमध्ये दोन वर्षाआधी महामंडळाने बदल केला आहे. त्या माध्यमातून जुन्या आरक्षण प्रणालीच्या जागी नवीन आरक्षण प्रणाली आणली. पण, सदर प्रणाली ही सोयीस्कर होण्याऐवजी जास्तच किचकट होत असल्याचे चित्र आहे. ऐन दिवाळीच्या मोक्यावरती आरक्षण प्रणाली पूर्ण बंद पडली असून प्रवाशांना नाहक त्रास होत आहे.
नव्या प्रणालीमुळे खर्चही वाढला
कर्मचाऱ्यांना मेमो देणे, मशीन इश्यू करणे या साठी आधी प्रिंट काढताना एक कागद लागत होता. आता एकाच मेमोची प्रिंट घेण्यासाठी तीन कागद लागतात. त्यामुळे खर्चही वाढल्याचे दिसून येत आहे.
पासच्या दरात कपात
राज्य मार्ग परिवहन महामंडळाने दिवाळीच्या आधी आवडेल तिथे प्रवास योजनेच्या पासमध्ये 20 ते 25 टक्के कपात केली आहे.