मुंबई : वैद्यकीय अभ्यासक्रमाच्या तिसऱ्या फेरीमध्ये 219 विद्यार्थ्यांनी प्रवेश घेतले असून, तिसऱ्या फेरीसाठी 387 जागा रिक्त राहिल्या आहेत. यामध्ये सरकारी महाविद्यालयामध्ये 37 जागा तर खासगी महाविद्यालयामध्ये 350 जागा रिक्त राहिल्या आहेत. तसेच तिसऱ्या फेरीमध्ये प्रवेश नाकारलेल्या 387 विद्यार्थी हे वैद्यकीय प्रवेश प्रक्रियेतून बाद होणार आहेत. या विद्यार्थ्यांनी प्रवेश नाकारल्याने चौथ्या फेरीसाठी 387 जागा रिक्त राहिल्या असून, चौथ्या फेरीमध्ये विद्यार्थ्यांमध्ये या जागा भरण्यासाठी मोठी चुरस होण्याची शक्यता आहे.
राज्यामध्ये वैद्यकीय अभ्यासक्रमाच्या महाविद्यालयामध्ये पहिल्या फेरीसाठी उपलब्ध असलेल्या 8 हजार 138 जागांवर 6 हजार 848 विद्यार्थ्यांनी प्रवेश घेतले होते. त्यामुळे दुसऱ्या फेरीसाठी 1 हजार 290 जागा रिक्त राहिल्या होत्या. मात्र दुसऱ्या फेरीपूर्वी राष्ट्रीय आयुर्विज्ञान आयोगाअंतर्गत असलेल्या वैद्यकीय समुपदेशन समितीने राज्यामध्ये खासगी व सरकारी महाविद्यालयांतर्गत 200 जागांना मान्यता दिली. त्यामुळे दुसऱ्या फेरीमध्ये प्रवेशासाठी 1 हजार 490 जागा उपलब्ध झाल्या होत्या. वैद्यकीय अभ्यासक्रमाची दुसरी फेरी 26 सप्टेंबर ते 2 ऑक्टोबर या कालावधीत राबवली. या फेरीनंतर तिसऱ्या फेरीसाठी 606 जागा रिक्त राहिल्या होत्या. यामध्ये सरकारी महाविद्यालयामध्ये 138 तर खासगी महाविद्यालयामध्ये 468 जागा होत्या.
तिसऱ्या फेरीसाठी उपलब्ध असलेल्या सर्व जागांवर विद्यार्थ्यांना प्रवेशाची संधी उपलब्ध करण्यात आली होती. मात्र तिसऱ्या फेरीमध्ये वैद्यकीय अभ्यासक्रमासाठी 219 जागांवरच विद्यार्थ्यांनी प्रवेश घेतले. यामध्ये शासकीय महाविद्यालयामध्ये 101 तर खासगी महाविद्यालयांमध्ये 118 विद्यार्थ्यांनी प्रवेश घेतले. त्यामुळे चौथ्या फेरीसाठी 387 जागा रिक्त आहेत.
रिक्त राहिलेल्या जागांमध्ये शासकीय महाविद्यालयामध्ये 37 तर खासगी महाविद्यालयामध्ये 350 जागा रिक्त आहेत. यामध्ये तिसऱ्या फेरीदरम्यान नवीन मान्यता मिळालेल्या खासगी महाविद्यालयांमधील जागा वाढण्याची शक्यता आहे. वैद्यकीय अभ्यासक्रमाच्या प्रवेश प्रक्रियेच्या नियमानुसार तिसऱ्या फेरीमध्ये प्रवेश नाकारलेले 387 विद्यार्थी हे प्रवेश फेरीतून बाद होणार आहेत.
दंत अभ्यासक्रमाच्या पहिल्या फेरीमध्ये 961 , तर दुसऱ्या फेरीमध्ये 866 विद्यार्थ्यांनी प्रवेश घेतल्याने तिसऱ्या फेरीसाठी 891 जागा उपलब्ध झाल्या होत्या. यामध्ये खासगी महाविद्यालयांमध्ये 838 तर सरकारी महाविद्यालयांमध्ये 53 जागा रिक्त राहिल्या होत्या. तिसऱ्या फेरीमध्ये दंत अभ्यासक्रमाला 383 विद्यार्थ्यांनी प्रवेश घेतल्याने 508 जागा रिक्त राहिल्या आहेत. यामध्ये शासकीय महाविद्यालयामध्ये 26 तर खासगी महाविद्यालयामध्ये 482 जागा रिक्त आहेत.