मुंबई: दक्षिण मुंबईतील भुलेश्वर येथील ‘भुलेश्वरचा राजा’ गणेशमूर्तीच्या आगमन मिरवणुकीदरम्यान घडलेल्या दुर्दैवी दुर्घटनेनंतर भुलेश्वरचा राजा गणेशोत्सव मंडळावर शोककळा पसरली आहे.
२२ फूट उंच गणेशमूर्तीचा तोल जाऊन ती कोसळल्याने मंडळाचे अध्यक्ष संकेत नेवशे आणि गणेशभक्त ब्रिजेश जोशी यांचा मृत्यू झाला, या दुर्घटनेच्या पार्श्वभूमीवर लालबाग येथील लालबागचा राजा सार्वजनिक गणेशोत्सव मंडळाने भुलेश्वरचा राजा गणेशोत्सव मंडळाला मदतीचा हात देत वडिलकीच्या नात्याने आर्थिक पाठबळ दिले आहे.
लालबागचा राजा सार्वजनिक गणेशोत्सव मंडळातर्फे भुलेश्वरचा राजा गणेशोत्सव मंडळाला ११ लाख रुपयांचा मदतनिधी जाहीर करण्यात आला आहे. तसेच दुर्घटनेत मृत्यू झालेल्या संकेत नेवशे आणि ब्रिजेश जोशी यांच्या कुटुंबीयांना प्रत्येकी पाच लाख रुपयांची आर्थिक मदत देण्यात येणार आहे.
लालबागचा राजा सार्वजनिक गणेशोत्सव मंडळाचे मानद सचिव सुधीर साळवी यांनी या मदतीची घोषणा केली.
गणेशोत्सवाच्या सुरुवातीलाच घडलेल्या या दुर्घटनेने गणेशभक्तांमध्ये हळहळ व्यक्त होत असताना, लालबागच्या राजाने पुढे केलेल्या मदतीच्या हातामुळे भुलेश्वरचा राजा मंडळ आणि मृतांच्या कुटुंबीयांना मोठा आधार मिळणार आहे.