मुंबई: केंद्र सरकारने फ्लेक्स-फ्यूएल वाहनांसाठी ई ८५ हे उच्च इथेनॉलमिश्रित इंधन नियमित पेट्रोलपेक्षा प्रतिलिटर २० रुपयांच्या सवलतीत सादर केले आहे. हे इंधन सुरुवातीला निवडक पेट्रोल पंपांवर उपलब्ध असेल आणि त्याचा वापर केवळ फ्लेक्स-फ्यूएल इंजिन असलेल्या वाहनांमध्येच करता येईल.
पेट्रोलियम आणि नैसर्गिक वायुमंत्री हरदीपसिंह पुरी यांनी नुकतेच येथील इंडियन ऑईलच्या पेट्रोल पंपावर ई ८५ इंधनाचे अनावरण केले. हे इंधन देशभरातील ४८ सार्वजनिक क्षेत्रातील पेट्रोल पंपांवर विकले जाणार आहे.
मंत्री पुरी म्हणाले की, डिसेंबर २०२६ पर्यंत ५०० पेट्रोल पंपांवर आणि डिसेंबर २०२७ पर्यंत सुमारे ५,००० पेट्रोल पंपांवर याची उपलब्धता वाढवण्याची सरकारची योजना आहे. ई ८५ इंधनामध्ये ८०-८५ टक्के इथेनॉल आणि १४-१९ टक्के पेट्रोल असते. याचा वापर केवळ फ्लेक्स-फ्यूएल वाहनांमध्येच केला जाऊ शकतो. ही वाहने एका प्रगत इंजिन कंट्रोल युनिटने सुसज्ज असतात, जी पेट्रोलमधील इथेनॉलच्या बदलत्या प्रमाणाशी जुळवून घेऊ शकतात.
पायाभूत सुविधांच्या विस्तारामुळे २०३०-३१ पर्यंत भारतातील एकूण इथेनॉल मिश्रणाची पातळी अंदाजे २६ टक्क्यांपर्यंत वाढण्यास मदत होण्याची अपेक्षा आहे. देशांतर्गत उत्पादित इथेनॉलचे फायदे थेट ग्राहकांपर्यंत पोहोचावेत, हे सुनिश्चित करण्यासाठी सरकारने ई ८५ ची किंमत पारंपरिक पेट्रोलपेक्षा प्रतिलिटर अंदाजे २० रुपयांनी कमी निश्चित केल्याचे त्यांनी स्पष्ट केले.
परकीय चलनाची बचत
मंत्री म्हणाले की, भारताने पेट्रोलमधील इथेनॉलचे मिश्रण प्रमाण २०१४ मधील १.५३ टक्क्यावरून आता २० टक्क्यांपर्यंत वाढवले असून, आपले लक्ष्य निर्धारित वेळेच्या पाच वर्षे आधीच साध्य केले आहे. यामुळे १.८४ लाख कोटी रुपयांपेक्षा जास्त परकीय चलनाची बचत झाली आणि कच्च्या तेलाची आयात अंदाजे ३०२ लाख मेट्रिक टनांनी कमी करावी लागली.
शेतकऱ्यांना भविष्यात मोठा फायदा
मंत्रालयाच्या अंदाजानुसार, पारंपरिक पेट्रोल वाहनांच्या तुलनेत ई ८५ वर चालणारी फ्लेक्स-फ्यूएल वाहने हरितगृह वायू उत्सर्जन अंदाजे ६१ टक्क्यांनी कमी करू शकतात. भारतात विकल्या जाणाऱ्या सर्व नवीन दुचाकी आणि प्रवासी वाहनांपैकी निम्मी वाहने फ्लेक्स-फ्यूएल तंत्रज्ञानावर आधारित झाली. तर, इथेनॉलची वार्षिक मागणी ३.१२ अब्ज लिटरपेक्षा जास्त वाढू शकते. याद्वारे शेतकऱ्यांना अंदाजे १२,४०३ कोटी रुपयांचे अतिरिक्त उत्पन्न मिळू शकते.