मुंबई : गोरेगाव येथील डॉ. राजश्री किशोर पेडणेकर या महिलेची तिच्याच पतीने गळा आवळून हत्या केल्याची घटना शुक्रवारी पहाटेच्या सुमारास घडली. या हत्येनंतर किशोर पेडणेकर यांनी त्यांच्या राहत्या इमारतीच्या टेरेसवरुन उडी घेऊन जीवन संपविले. मानसिक नैराश्यासून हा प्रकार घडल्याचा प्राथमिक अंदाज असल्याचे पोलीस निरीक्षक मधुसूदन नाईक यांनी सांगितले.
याप्रकरणी गोरेगाव पोलिसांनी दोन स्वतंत्र अपमृत्यूची नोंद करुन तपास सुरु केला आहे. लवकरच पेडणेकर कुटुंबियांसह त्यांच्या नातेवाईक व मुलाची पोलिसांकडून जबाब नोंदविण्यात येणार आहे. या जबाबातून या घटनेमागील अधिकृत कारणाचा खुलासा होण्याची शक्यता वर्तविण्यात येत आहे. किशोर पेडणेकर हे त्यांची डॉक्टर पत्नी राजश्री हिच्यासोबत गोरेगाव येथील टोपीवाला मेन्शन इमारतीच्या तिसऱ्या मजल्यावरील फ्लॅट क्रमांक ३२ मध्ये राहत होते. राजश्रीचा मालाड येथे फिजिओथेरेपी क्लिनिक आहे तर किशोर हे दहिसर येथील एका खाजगी कंपनीत कामाला आहे. ही कंपनी जिम उपकरणे पुरविण्याचे काम करते. त्यांचा एक मुलगा असून तो सध्या दिल्लीत राहतो. दिल्लीतील एका खाजगी कंपनीत तो कामाला आहे.
गेल्या काही दिवसांपासून किशोर हे मानसिक तणावात होते. त्यामुळे त्यांच्यावर औषधोपचार सुरु होते. त्यातून आलेल्या नैराश्यातून त्यांनी त्यांची पत्नी राजश्री हिची गळा आवळून हत्या केली आणि नंतर त्याने इमारतीच्या टेरेसवरुन उडी घेऊन आत्महत्या केली. सकाळी साडेपाच वाजता किशोर हे रक्ताच्या थारोळ्यात इमारतीच्या आवारात पडल्याचे सुरक्षारक्षकाला दिसले.
त्यामुळे त्याने स्थानिक रहिवाशांसह गोरेगाव पोलिसांना ही माहिती दिली. या माहितीनंतर पोलीस निरीक्षक मधुसुदन नाईक व त्यांच्या पथकाने घटनास्थळी धाव घेतली होती. त्यांना ट्रॉमा रुग्णालयात दाखल केले असता तिथे किशोर यांना डॉक्टरांनी मृत घोषित केले. त्यानंतर पोलिसांनी त्यांच्या पत्नीला संपर्क साधण्याचा प्रयत्न केला. मात्र तिचा संपर्क होऊ शकला नाही. त्यामुळे ही माहिती त्यांच्या बहिणीसह इतर नातेवाईकांना देण्यात आली.
किशोर यांच्या सोनसाखळीमध्ये फ्लॅटची चावी होती, ही चावी घेऊन पोलीस नातेवाईकासह त्यांच्या फ्लॅटमध्ये गेले होते. यावेळी तिथे राजश्री या बेशुद्धावस्थेत पडल्या होत्या. तिची काहीच हालचाल नव्हती. त्यामुळे तिला ट्रॉमा रुग्णालयात दाखल करण्यात आले होते. तिथे तिला डॉक्टरांनी मृत घोषित केले.
प्राथमिक तपासात किशोर यांनी त्यांच्या पत्नीची हत्या करुन नंतर आत्महत्या केली असावी अशी शंका पोलीस निरीक्षक मधुसुदन नाईक यांनी बोलताना सांगितले. त्यामुळे पोलिसांनी दोन स्वतंत्र अपमृत्यूची नोंद करुन तपास सुरु केला आहे. किशोर यांच्या मुलासह नातेवाईकांची जबानी नोंदविण्यात येत असून या जबानीतून या घटनेमागील कारणाचा खुलासा होण्याची शक्यता वर्तविण्यात येत आहे. या दोघांचे मृतदेह शवविच्छेदनानंतर त्यांच्या नातेवाईकांना सोपविण्यात येणार आहे.