भोकरदन तालुक्यातील लिंगेवाडी येथे शेतात विजेचा शॉक लागून दोन चुलत भावाचा मृत्यू झाला आहे. सचिन रामकीसन घोडे (वय २३), पवन गजानन घोडे (वय २३) अशी मृत तरुणांची नावे आहेत. ही दुर्घटना मंगळवारी लिंगेवाडी येथील घोडे वस्तीवर राहणाऱ्या रामकीसन घोडे यांच्या शेतातील घरासमोर घडली.
याविषयी मिळालेली अधिक माहिती अशी, भोकरदन शहरासह परिसरात सकाळ पासून संततधार पाऊस सुरू होता दुपारी १२ वाजता दरम्यान पाऊस उघडला. यानंतर शेतात बैलासाठी कडबा कुट्टी मशीन सुरू करण्यासाठी पवन व सचिन गेले. दाेघांनाही मशीन व वायर मध्ये उतरलेल्या विजेचा शॉक बसला.
त्यांना तात्काळ भोकरदन येथील ग्रामीण रुग्णालयात नेण्यात आले. डॉ. श्रीमती मेहत्रे यांनी दाेघांना मृत घोषित केले. शवविच्छेदन करून मृतदेह नातेवाईकांच्या ताब्यात देण्यात आला असून त्यांच्यावर लिंगेवाडी येथे शोकाकूल वातावरण अंत्यसंस्कार करण्यात आले.
दोन्ही तरुण हे भोकरदन शहरात गॅरेजमध्ये मॅकॅनिक म्हणून काम करत होते. त्याचबरोबर ते महाविद्यालयीन शिक्षण देखील घेत होते. दोघा चुलत भावांच्या मृत्यूमुळे घोडे परिवारावर दुःखाचा डोंगरच कोसळला आहे. लिंगेवाडी गावावर परिसरात शोककळा पसरली आहे. दरम्यान दोघांच्या कुटुंबात अत्यल्प शेतजमीन असून पवन यांच्या पश्चात आई, वडील व दोन भाऊ आहे तर सचिनच्या पश्चात आई, वडील, एक भाऊ , एक बहीण असा परिवार आहे.
हेही वाचले का?