Purna Municipal Council co-opted members
पूर्णा : पूर्णा नगरपरिषदेच्या उपनगराध्यक्ष व दोन स्वीकृत सदस्य पदांची निवड प्रक्रिया मंगळवारी (दि. १३) दुपारी नगरपरिषदेच्या डॉ. ए. पी. जे. अब्दुल कलाम सभागृहात पार पडली. नगराध्यक्षा विमलबाई कदम यांच्या अध्यक्षतेखाली आणि मुख्याधिकारी डॉ. उत्कृष्ट गुट्टे यांच्या उपस्थितीत ही निवड प्रक्रिया पार पडली.
या निवडीत यशवंत सेनेचे नगरसेवक मुकुंद विठ्ठलराव भोळे यांची बहुमताने उपनगराध्यक्षपदी निवड झाली. तर स्वीकृत सदस्यपदी यशवंत सेनेचे शेख नाहीद अमजद नुरी आणि पूर्णा विकास आघाडीच्या वतीने उबाठा शिवसेनेचे संतोष एकलारे यांची निवड करण्यात आली.
पूर्णा नगरपरिषदेची सार्वत्रिक निवडणूक २१ डिसेंबर २०२५ रोजी पार पडली होती. या निवडणुकीत यशवंत सेनेच्या विमलबाई कदम या थेट जनतेतून नगराध्यक्षा म्हणून बहुमताने निवडून आल्या होत्या. नगरपरिषदेत यशवंत सेना ७, काँग्रेस ६, उबाठा शिवसेना २, भाजप २, शिंदे शिवसेना २, पूर्णा विकास आघाडी २ आणि जनता दल सेक्युलर २ असे सदस्य निवडून आले होते. मात्र कोणत्याही एका पक्षाला स्पष्ट बहुमत मिळाले नव्हते.
यानंतर उपनगराध्यक्ष व स्वीकृत सदस्य निवडीची तारीख जाहीर होताच सर्वच पक्षांकडून राजकीय हालचालींना वेग आला. शहर विकासाच्या मुद्द्यावर आमदार डॉ. रत्नाकर गुट्टे आणि युवा नेते नितीन कदम यांच्या नेतृत्वाखाली काँग्रेसच्या सहा नगरसेवकांनी यशवंत सेनेच्या नगराध्यक्षा विमलबाई कदम यांना जाहीर पाठिंबा दिला. या घडामोडींमुळे नगरपरिषदेत राजकीय समीकरणे बदलली.
यशवंत सेनेकडे ७ सदस्य असल्याने नियमानुसार त्यांचा एक स्वीकृत सदस्य निवडला जाणे अपेक्षित होते. मात्र काँग्रेसच्या सहा नगरसेवकांच्या पाठिंब्यामुळे यशवंत सेनेतर्फे अमजद नुरी यांची स्वीकृत सदस्यपदी सर्वानुमते निवड करण्यात आली.
नगरपरिषद निवडणुकीनंतर उपनगराध्यक्षपदासाठी आमदार डॉ. रत्नाकर गुट्टे यांनी सर्वांशी सल्लामसलत करून नूतन नगरसेवक मुकुंद भोळे यांच्या नावावर शिक्कामोर्तब केले होते. प्रत्यक्ष निवड प्रक्रियेत यशवंत सेना व काँग्रेसच्या नगरसेवकांनी या निर्णयाला पाठिंबा देत भोळे यांना एकूण १३ मते दिली. त्यामुळे यशवंत सेनेचे निष्ठावंत कार्यकर्ते मुकुंद भोळे यांना न्याय मिळाल्याची भावना नागरिकांमध्ये व्यक्त होत आहे.
उपनगराध्यक्ष व स्वीकृत सदस्य निवडीनंतर दुपारी तीन वाजल्यानंतर शहरातून विजयी मिरवणूक काढण्यात आली. यावेळी उपनगराध्यक्ष मुकुंद भोळे व स्वीकृत सदस्य शेख नाहीद अमजद नुरी यांचे नगरसेवक व कार्यकर्त्यांनी जल्लोषात स्वागत केले. मिरवणुकीदरम्यान आमदार डॉ. रत्नाकर गुट्टे हे जिपवरून डिजेच्या तालावर आनंदाने नाचताना दिसून आले. या विजयामुळे यशवंत सेनेच्या कार्यकर्त्यांमध्ये उत्साहाचे वातावरण होते.