पाथरी - शहरातील नामदेव नगर येथील आयटीआयसमोरील साई हॉटेलमध्ये दि. २१ सप्टेंबर सोमवार रोजी पहाटे ५.४५ वाजता आग लागली. शॉर्टसर्किटमुळे अचानक आग लागून आगीचा भडका उडाल्याची माहिती मिळताच पाथरी नगरपरिषदेच्या अग्निशामक दलाने घटनास्थळी धाव घेतली.
हॉटेलचे मालक नितीन कुमार विष्णू वैराळे तसेच हॉटेल चालक राहुल तौर यांनी अग्निशामक दलाला फोनद्वारे माहिती दिली. कर्तव्यावर असलेले फायरमन शेख शेरू व फायरमन बळीराम गवळे हे अग्निशामक वाहनासह तातडीने घटनास्थळी दाखल झाले. परिस्थितीचे गांभीर्य ओळखून पथकाने युद्धपातळीवर आग विझविण्याचे काम सुरू केले.
आगीच्या ठिकाणी असलेले दोन भरलेले गॅस सिलिंडर सुरक्षितपणे बाहेर काढण्यात अग्निशामक दलाला यश आले. त्यानंतर शर्थीच्या प्रयत्नांनी आग पूर्णपणे आटोक्यात आणण्यात आली. त्यामुळे मोठा अनर्थ टळला.
अग्निशामक दलाची तत्परता आणि धाडसी कारवाईमुळे परिसरातील नागरिकांनी सुटकेचा श्वास घेतला. हॉटेल मालक तसेच परिसरातील नागरिकांनी पाथरी नगरपरिषदेच्या अग्निशामक पथकाचे तत्परतेबद्दल आभार मानले.