मानवत : सणासुदीच्या खरेदीसाठी सासूसोबत मानवत शहरात आलेल्या १९ वर्षीय नवविवाहितेला अज्ञात व्यक्तीने फूस लावून पळवून नेल्याची घटना उघडकीस आली आहे. ही घटना १४ सप्टेंबर रोजी दुपारी ३ वाजण्याच्या सुमारास मानवत बसस्थानक परिसरात घडली. याप्रकरणी १८ सप्टेंबर रोजी मानवत पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, मानवत तालुक्यातील एका गावातील या विवाहितेचा विवाह २०२५ मध्ये झाला होता. सणानिमित्त खरेदी करण्यासाठी ती आपल्या सासूसोबत मानवत शहरात आली होती. खरेदीदरम्यान सासू मेमरी कार्ड खरेदी करण्यासाठी एका दुकानात गेली असता, विवाहिता बसस्थानक परिसरात थांबली होती.
मात्र, काही वेळाने सासू परत आल्यानंतर संबंधित विवाहिता तेथे आढळून आली नाही. त्यानंतर नातेवाईकांसह परिसरात शोधाशोध करण्यात आली. विविध ठिकाणी चौकशी करूनही तिचा कोणताही मागमूस लागला नाही. त्यामुळे अज्ञात व्यक्तीने तिला फूस लावून अज्ञात कारणासाठी पळवून नेल्याची शंका व्यक्त करण्यात आली आहे.
या प्रकरणी पतीच्या फिर्यादीवरून मानवत पोलीस ठाण्यात अज्ञात आरोपीविरुद्ध भारतीय न्याय संहिता (BNS) कलम १३७(२) अन्वये गुन्हा दाखल करण्यात आला आहे. पोलीस निरीक्षक दर्शन शिंदे यांच्या मार्गदर्शनाखाली पुढील तपास सुरू आहे.
