नायगाव : लोकशाहीर अण्णाभाऊ साठे जयंतीच्या पार्श्वभूमीवर कुंटूर पोलीस ठाण्याच्या हद्दीत सुरू असलेल्या विशेष गस्ती मोहिमेदरम्यान देगाव फाटा येथे देशी दारूची चोरटी वाहतूक करणाऱ्या दोघांना पोलिसांनी रंगेहात पकडले. या कारवाईत देशी दारूच्या ९६ बाटल्या व मोटारसायकलसह ७७ हजार ६८० रुपयांचा मुद्देमाल जप्त करण्यात आला.
पोलीस सूत्रांकडून मिळालेल्या माहितीनुसार, १ ऑगस्ट २०२६ रोजी सहाय्यक पोलीस निरीक्षक (API) विशाल भोसले, हेड कॉन्स्टेबल कंधारे व पोलीस कॉन्स्टेबल हंबर्डे हे कुंटूर पोलीस ठाण्याच्या हद्दीत विशेष पेट्रोलिंग करीत असताना देगाव फाटा येथे संशयास्पदरीत्या येणारी एमएच-२६-सीए-८९६४ क्रमांकाची पल्सर मोटारसायकल अडवून तपासणी करण्यात आली. तपासणीदरम्यान मोटारसायकलवरील खाकी रंगाच्या पोत्यामध्ये 'देशी भिंगरी संत्रा' ब्रँडच्या ९६ दारूच्या बाटल्या आढळून आल्या.
या दारूच्या साठ्याची किंमत ७ हजार ६८० रुपये असून, ७० हजार रुपये किमतीची मोटारसायकल जप्त करण्यात आली. असा एकूण ७७ हजार ६८० रुपयांचा मुद्देमाल पोलिसांनी हस्तगत केला. या प्रकरणी रामेश्वर गुणवंतराव गुडपे (वय ३०) व बालाजी गोविंदराव गुडपे (वय २८, दोघेही रा. देगाव, ता. नायगाव) यांच्याविरुद्ध महाराष्ट्र दारूबंदी अधिनियमाच्या कलम ६५(ई) अन्वये गुन्हा दाखल करण्यात आला असून, पुढील तपास कुंटूर पोलीस करीत आहेत.