उदगीर : महाराष्ट्र सरकारने प्रतिबंधित केलेल्या गुटखा, पान मसाला, सुगंधित तंबाखूची अवैध वाहतूक करणाऱ्या दोघांना उदगीर ग्रामीण पोलिसांनी बिदर गेट, ठाकरे चौक परिसरात सापळा रचून जेरबंद केले आहे. त्यांच्याकडून १ लाख ८७ हजार ९५० रुपयांचा प्रतिबंधित गुटखा तसेच ८ लाख रुपयांची स्विफ्ट डिझायर कार असा एकूण ९ लाख ८७ हजार ९५० रुपयांचा मुद्देमाल जप्त करण्यात आला आहे.
याप्रकरणी पोलीस स्टेशन उदगीर ग्रामीण येथे गु.र.नं. ७१९ /२०२६ कलम १२३, २२३ , २७४, २७५ , ३ (५) BNS सह कलम ५९ अन्न व सुरक्षा मानके अधिनियम अन्वये गुन्हा दाखल करण्यात आला आहे.
पोलिसांनी दिलेली माहिती अशी की, दि. १४ /१० /२०२६ रोजी रात्री ९:३० वाजता बिदर गेट, ठाकरे चौकात पोलीस अंमलदार बजरंग नागनाथ गजलवार, ब. नं. १८४६,ने. पोलिस स्टेशन उदगीर ग्रामीण हे पेट्रोलिंग करीत असताना संशयित कार क्रमांक एम. एच. बी. एफ. ९३९० मारुती सुझुकी डिझायर ही थांबवून तपासली. तर त्यामध्ये महाराष्ट्र सरकारने प्रतिबंधित केलेला अन्न पदार्थ पान मसाला, सुगंधित पान मसाला, सुगंधित तंबाखूजन्य गुटखा आढळून आला.
या प्रकरणी दोन आरोपींना ताब्यात घेण्यात आले आहे. मंचक रघुनाथ मोटे (वय ३१, व्यवसाय मजुरी, रा. आपोली, ता. गंगाखेड, जि. परभणी), मोतीराम मुंजाजी गायकवाड (वय ३९ वर्षे, व्यवसाय मजुरी, रा. आपोली, ता. गंगाखेड, जि. परभणी) या गुन्ह्याचा पुढील तपास पोलिस उपनिरीक्षक नरवटे हे करीत आहेत.