Crackdown on water theft from the pipeline between Manjara Dam and Latur city
लातूर, पुढारी वृत्तसेवा : लातूर शहराचा पाणीपुरवठा सुरळीत ठेवण्यासाठी मांजरा धरण ते हरंगूळ जलशुद्धीकरण केंद्रापर्यंतच्या मुख्य जलवाहिनीवरील पाणीचोरी रोखण्याची मोहीम प्रशासनाने तीव्र केली आहे. रविवारी (दि. २५) राबविण्यात आलेल्या संयुक्त कारवाईत तब्बल २८ अनधिकृत नळजोडण्या तोडण्यात आल्या. तसेच विनापरवाना पाणी उपसण्यासाठी वापरण्यात येणारे पाइपही जप्त करण्यात आले. महिनाभरातील ही तिसरी मोठी कारवाई आहे.
मुख्य जलवाहिनीवरील अनधिकृत जोडण्या यापूर्वी दोन वेळा तोडण्यात आल्या होत्या. मात्र, तरीही काही ठिकाणी अनधिकृतपणे पाणी घेतले जात असल्याचे निदर्शनास आल्याने जिल्हाधिकारी डॉ. भारत बास्टेवाड आणि महापालिका आयुक्त राहुल कुलकर्णी यांनी पुन्हा कारवाईचे निर्देश दिले.
त्यानुसार महापालिकेच्या विशेष शोध पथकाने महसूल आणि पोलीस प्रशासनाच्या सहकार्याने ही मोहीम राबविली. या कारवाईत तांदूळजा, रांजणी, घारगाव, ताडगाव आणि हिंगणगाव येथील अवैध जोडण्या खंडित करण्यात आल्या. त्यात तांदूळजा येथील एक रांजणीतील पाच, घारगावमधील दहा, ताडगावमधील एक आणि हिंगणगावमधील अकरा जोडण्यांचा समावेश आहे.
विविध आकारांच्या पाइपद्वारे मुख्य जलवाहिनीतून विनापरवाना पाणी उपसले जात होते. तांदूळजा येथे कारवाईदरम्यान महापालिका आयुक्त राहुल कुलकर्णी उपस्थित होते. यावेळी उपविभागीय अधिकारी रोहिणी नन्हे-विरोळे, उपविभागीय पोलीस अधिकारी मेघना आय. एन., तहसीलदार सौदागर तांदळे, पोलीस उपनिरीक्षक अंधारे आणि उपायुक्त तथा पाणीपुरवठा विभागाचे समन्वयक डॉ. पंजाबराव खानसोळे यांनी मोहिमेत सहभाग घेतला. यापूर्वी कारवाईला स्थानिक पातळीवर विरोध झाला होता. मात्र, ग्रामस्थ आणि लोकप्रतिनिधींशी संयुक्त बैठक घेतल्यानंतर कारवाई पूर्ण करण्यात आली.
पाणीचोरी करणाऱ्यांना इशारा
मुख्य जलवाहिनीतून किंवा तलावातून विनापरवाना पाणी उपसण्याचे प्रकार खपवून घेतले जाणार नाहीत, असा इशारा महापालिका आयुक्त कुलकर्णी यांनी दिला. आगामी काळात शहर परिसरातील अनधिकृत नळजोडण्या आणि विनापरवाना पाणी उपसण्याविरोधात शोधमोहीम अधिक तीव्र करण्यात येणार आहे. नागरिकांनी पाण्याचा काटकसरीने वापर करावा आणि अनधिकृत जोडण्या अधिकृत करून प्रशासनाला सहकार्य करावे, असे आवाहनही करण्यात आले.