Uncle and aunt commit deadly attack on 24-year-old nephew
जालना, पुढारी वृत्तसेवाः वडिलांशी सुरू असलेल्या किरकोळ वादाचा जाब विचारल्याचा भयंकर राग धरून काका व काकूने मिळून २४ वर्षीय पुतण्यावर जीवघेणा हल्ला आहे. ही संतापजनक घटना भोकरदन तालुक्यातील एकेफळ शिवारात घडली. काकूने हातातील खुरप्याने सपासप वार केले, तर काकाने लाकडी दांड्याने डोक्यात प्रहार करून डोके फोडले. या रक्तरंजित घटनेमुळे एकेफळ परिसरात प्रचंड खळबळ उडाली असून हसनाबाद पोलीस ठाण्यात आरोपी काका व काकूंविरुद्ध गंभीर कलमांखाली गुन्हा दाखल करण्यात आला आहे.
फिर्यादी रवी बंडु लहाने (वय २३ वर्ष, व्यवसाय शेती, रा. एकेफळ, ता. भोकरदन) हे सोमवार, दि. १७ रोजी दुपारी १ वाजेच्या सुमारास आपल्या एकेफळ शिवारातील शेत गट क्रमांक १७७ मध्ये शेतात काम करत होते.
त्याच वेळी त्यांचे काका आत्माराम लक्ष्मण लहाने व काकू कविता आत्माराम लहाने हे रवी यांचे वडील बंडु लहाने यांच्याशी जोरात भांडण करत असल्याचे रवी यांच्या निदर्शनास आले. आपल्या वडिलांशी होत असलेल्या भांडणाचा जाब विचारण्यासाठी रवी लहाने तिथे गेले आणि "तुम्ही माझ्या वडिलांसोबत का भांडण करता?" असे विचारले.
याचा प्रचंड राग आल्याने काकू कविता लहाने यांनी कोणतीही दया न दाखवता हातातील खुरप्याने रवी यांच्या कानावर आणि डाव्या हातावर वार करून गंभीर जखमी केले. या प्रकरणी पीडित रवी बंडु लहाने यांच्या फिर्यादीवरून आत्माराम लक्ष्मण लहाने (काका) आणि कविता आत्माराम लहाने (काकू) (दोन्ही रा. एकेफळ, ता. भोकरदन) या दोघांविरुद्ध गुन्हा दाखल करण्यात आला आहे. तपास पोलीस हवालदार सागर सुगदेव देवकर करत आहेत.