जालना ः महावितरणच्या 33 केव्ही वाहिनीवर अज्ञात इसमाने खोडसाळपणे ॲल्युमिनियमची तार फेकल्याने 11 गावांचा वीजपुरवठा 12 तासांपेक्षा अधिक काळ खंडित राहिला. या प्रकरणी अज्ञातावर तालुका जालना पोलिस ठाण्यात गुन्हा दाखल करण्यात आला आहे.
33/11 केव्ही गोलापांगरी उपकेंद्रातून हिस्वण उपकेंद्राकडे येणारी 33 केव्ही हिस्वण विद्युत वाहिनी आहे. 8 एप्रिल 2026 रोजी रात्री 8.20 वाजेच्या सुमारास ही वाहिनी बंद पडली. महावितरणच्या जालना ग्रामीण-2 शाखेचे कनिष्ठ अभियंता प्रवीण पंडित व त्यांचे सहकारी अरुण पवार, मनोज कावळे, अंकुश गोल्डे यांनी लागलीच पेट्रोलिंग करण्यास सुरुवात केली. तेव्हा बठाण शिवारात या वाहिनीवर अज्ञात व्यक्तीने ॲल्युमिनियमची तार फेकल्याचे आढळून आले.
या तारेमुळे 33 केव्ही वाहिनीचे शॉर्टसर्किट होऊन 11 गावांचा वीजपुरवठा खंडित झाला. त्यात हिस्वण उपकेंद्रातील हिस्वण, माळी पिंपळगाव, पोकळ वडगाव, रेवगाव, इस्लामवाडी, पुनेगाव, तांदुळवाडी, दुधना काळेगाव, बठाण, दैठणा व काटखेडा या गावांचा वीजपुरवठा 8 एप्रिलच्या रात्री 8.20 पासून ते 9 एप्रिलच्या सकाळी 9.10 वाजेपर्यंत खंडित होता.
अज्ञात व्यक्तीने खोडसाळपणे वीज वाहिनीवर तार फेकून वीजपुरवठा बंद केला. हा प्रकार महावितरणच्या आर्थिक नुकसानीस कारणीभूत ठरला. कनिष्ठ अभियंता प्रवीण पंडित यांच्या फिर्यादीवरून अज्ञात इसमावर तालुका जालना पोलिस ठाण्यात गुन्हा नोंदवण्यात आला आहे.