जालना/वडीगोद्री, पुढारी वृत्तसेवा : मराठा आरक्षण आंदोलनाचे नेते मनोज जरांगे पाटील यांना जीवे मारण्याची धमकी आणि त्यांच्या विरोधात हत्येचा कट रचल्याच्या आरोपावरून गेवराई येथील दोन जणांना चौकशीसाठी ताब्यात घेण्यात आले आहे. जरांगे यांच्या हत्येसाठी अडीच कोटींची सुपारी दिल्याची चर्चा आहे.
शांतता बाळगण्याचे आवाहन
मी समाजासाठी रक्त जाळायचे नाही तर रक्त सांडायची तयारी ठेवली आहे. समाजाने या प्रकरणात शांतता बाळगून संयम पाळावा. मुख्यमंत्री देवेंद्र फडणवीस या प्रकरणी कारवाई करतील. कट रचणाऱ्या नेत्याला चौकशीला बोलवून सखोल चौकशीचे आदेश देतात का याकडे समाज बघत आहे. त्या नेत्याने परिसीमा गाठली आहे. त्याला किती प्रकरणात सोडायचे असा प्रश्न जरांगे यांनी उपस्थित केला.
जरांगे यांनी बुधवारी रात्री पोलिस अधीक्षक अजयकुमार बन्सल यांची या प्रकरणी भेट घेऊन त्यांना माहिती दिल्याचे सूत्रांनी सांगितले. पोलिसांनी या प्रकरणी तातडीने कारवाई करत दोन संशयितांना ताब्यात घेतले आहे. जालना पोलिसांकडून संशयितांची सखोल चौकशी सुरू आहे. पोलिस अधीक्षक अजयकुमार बंसल यांना विचारणा केली असता त्यांनी या प्रकरणी जरांगे यांनी बुधवारी रात्री भेट घेतल्याचे सांगून प्राथमिक चौकशी सुरू असल्याचे सांगितले.
आज पर्दाफाश करणार
माझ्या हत्येचा कट रचणाऱ्यांचा शुक्रवारी सकाळी ११ वाजता पत्रकार परिषद घेऊन पर्दाफाश करणार असल्याचे जरांगे यांनी अंतरवाली येथे गुरुवारी माध्यामांशी बोलताना सांगितले. मला जिवे मारण्याचा कट रचला गेल्याच्या प्रकरणात जालना पोलिसांनी दोन आरोपींना ताब्यात घेतले आहे. यासंदर्भात शुक्रवारी सकाळी अकरा वाजता हत्येचा कोणी कट शिजवला, कसा शिजला, मुख्य म्हणजे तो कट शिजणारा नेता कोण याबाबतचे सर्व पुरावे पत्रकार परिषद घेऊन जाहीर करणार आहे.
जालन्याचे पोलिस अधीक्षक अजयकुमार बंसल हे तपासावर लक्ष ठेवून आहेत. घातपात किंवा हत्या करायाचा कट रचल्याचे माहिती सत्य असून हे नाकारता येणार नाही. हा डाव खूप मोठ्या नेत्यांनी शिजवला आहे. ते तपासात निष्पन्न होईलच. कट शिजणाऱ्या नेता चुकीच्या ठिकाणी खेटला आहे. त्याने आजपर्यंत केलेले षडयंत्र, रचलेले कट कोणी भेदले नसले तरी त्याची साखळी आम्ही भेदली असल्याचा दावा जरांगे यांनी केला. उष्टे, खरकटे, कट रचणारे खूप बघितले. कट रचणाऱ्या नेत्याला सरकार सोडणार नाही, असा विश्वास त्यांनी व्यक्त केला. दरम्यान, जरांगे यांना धमकीपत्र व हत्येचा कट रचल्याचे पुढे आल्यानंतर जरांगे यांच्या सुरक्षिततेसाठी असणाऱ्या बंदोबस्तात वाढ झाली असल्याचे पोलिस सूत्रांनी सांगितले.