A unique protest against the administration with blindfolds over the eyes
भोकरदन, पुढारी वृत्तसेवा :
शेतकऱ्यांच्या प्रश्नावर आवाज उठवणाऱ्यांचा आवाज गुन्हा दाखल करून दाबला जात असल्याचा आरोप करत बुधवार दि. ३१ रोजी सामाजिक कार्यकर्ते मंगेश साबळे यांच्यासह इतरांनी डोळ्याला पट्टी व हाताला दोरी बांधून अनोखे आंदोलन केले.
दरम्यान, शेतकऱ्यांच्या प्रश्नांवरून सामाजिक कार्यकर्ते विकास जाधव व बळीराजा फाउंडेशनचे नारायण लोखंडे यांनी सुरू केले होते. सरपंच मंगेश साबळे यांनी डफली आंदोलन करत आंदोलन केले. या आंदोलनाची दखल घेत प्रशासनाने तत्काळ उपोषणकर्त्यांच्या मागण्या मान्य केल्या व उपोषण सुटले.
मात्र उपोषण सुटून अवघ्या तीन दिवसांनंतर नायब तहसीलदार यांनी सरपंच मंगेश साबळे यांच्यासह १२ सहकाऱ्यांवर शासकीय कामात अडथळा आणल्याचा गुन्हा दाखल करण्यात आला. यामुळे शेतकऱ्यांतून तीव्र संताप व्यक्त करण्यात येत आहे.
सिंचन विहीर मागितली हा गुन्हा तर अटक करा आम्ही डफली वाजवून प्रशासनाला जागे केले. मागण्या मान्य झाल्या, पण नंतर सूडबुद्धीने माझ्यावर व १२ सहकाऱ्यांवर खोटे गुन्हे दाखल करण्यात आले. शेतकऱ्यांच्या प्रश्नांवर आवाज उठवणाऱ्यांना गुन्हे दाखल करून गप्प करण्याचा हा सरकारचा प्रयत्न आहे. शेतकऱ्यांच्या हक्कांसाठी गरज पडली तर संपूर्ण तालुका जेलमध्ये जाण्यास तयार आहे. हे गुन्हे त्वरित मागे घेतले नाहीत तर आंदोलन आणखी तीव्र करण्यात येईल.-सरपंच मंगेश साबळे