Child Development Officer Bribe
हिंगोली : शहरातील अंगणवाडी मदतनीसपदावर निवड करून देण्यासाठी २५ हजार रुपयांची लाच घेताना बालविकास प्रकल्प अधिकारी विक्रमसिंह चव्हाण (वय ३८) यांना लाचलुचपत प्रतिबंधक विभागाच्या पथकाने बुधवारी (दि.६) दुपारी रंगेहात पकडले.
तक्रारदाराच्या पत्नीची अंगणवाडी मदतनीस म्हणून निवड करण्यात आली होती. या निवडीच्या मोबदल्यात प्रकल्प अधिकारी चव्हाण यांनी एकूण ८० हजार रुपयांची लाच मागितली होती. त्यापैकी पहिल्या टप्प्यात तक्रारदाराने ५० हजार रुपये दिले होते, तर उर्वरित ३० हजार रुपये नंतर देण्याचे ठरले होते. तक्रारदाराने रक्कम कमी करण्याची विनंती केल्यानंतर प्रकल्प अधिकारी यांनी २५ हजार रुपयांवर तडजोड केली.
तक्रारदाराने या प्रकरणाची माहिती लाचलुचपत प्रतिबंधक विभागाला दिली. त्यानुसार, विभागाचे उपाधीक्षक विकास घनवट, पोलिस निरीक्षक राजेश मलपिल्लु, जमादार भगवान मंडलीक, गजानन पवार, रवींद्र वरणे, राजाराम फुफाटे, विनोद पुंडगे, विजय शुक्ला, अमोल जाधव, शेख अकबर यांच्या पथकाने बुधवारी दुपारी साडेचार वाजता कार्यालय परिसरात सापळा रचला.
यावेळी तक्रारदाराने ठरल्याप्रमाणे २५ हजार रुपये दिल्यानंतर प्रकल्प अधिकारी विक्रमसिंह चव्हाण यांनी ती रक्कम स्वीकारली. त्याच क्षणी पथकाने त्यांना रंगेहात पकडले. या प्रकरणी हिंगोली शहर पोलिस ठाण्यात गुन्हा दाखल करण्याची प्रक्रिया सुरू आहे.