कालिदास गोरे
लोहारा : पावसाने मोठी ओढ दिल्याने लोहारा तालुक्यासह परिसरातील खरीप पिकांची अवस्था अत्यंत बिकट झाली आहे. पावसाच्या प्रतीक्षेत उभी असलेली सोयाबीन, तूर, मूग, उडीद आदी पिके करपून गेल्याने शेतकऱ्यांमध्ये संताप आणि आक्रोश निर्माण झाला आहे. त्यामुळे मुख्यमंत्री, मंत्री व लोकप्रतिनिधींचे पाहणी दौरे आणि पंचनाम्यांपेक्षा तातडीने भरीव आर्थिक मदत जाहीर करावी, अशी मागणी शेतकरी वर्गातून होत आहे.
यंदा सुरुवातीला पावसाने साथ दिल्याने पिकांची उगवण चांगली झाली. मात्र त्यानंतर पावसाने दीर्घ खंड दिल्याने जमिनीतील ओलावा संपला आणि पिकांची वाढ खुंटली. अनेक भागांत सोयाबीनचे पीक पूर्णपणे करपले असून, तूर, मूग व उडीद पिकांनाही मोठा फटका बसला आहे. काही ठिकाणी पिके हिरवी दिसत असली तरी फुलोरा आणि शेंगा न लागल्याने उत्पादनात मोठी घट होण्याची शक्यता आहे.
पावसाच्या प्रत्येक नक्षत्राकडे शेतकरी आशेने पाहत होता. मात्र एकापाठोपाठ नक्षत्रे कोरडी गेल्याने शेतकऱ्यांच्या आशा मावळल्या आहेत. पेरणी, बियाणे, खते, औषधे, मशागत आणि मजुरीवर झालेला खर्च वाया जाण्याची भीती आहे. पिकांसोबतच ग्रामीण भागातील पिण्याच्या पाण्याचा आणि जनावरांच्या चाऱ्याचा प्रश्नही गंभीर झाला आहे.
विहिरी व बोअरवेलच्या पाणीपातळीत घट होत असून, शेतातील चारा करपल्याने पशुपालकांसमोर जनावरे सांभाळण्याचे आव्हान निर्माण झाले आहे. त्यामुळे गरज असलेल्या भागात तातडीने चारा छावण्या सुरू कराव्यात, अशी मागणी होत आहे.नुकसानग्रस्त शेतकऱ्यांना भरीव आर्थिक मदत देण्यासोबतच १०० टक्के पीकविमा नुकसानभरपाईसाठी तातडीने कार्यवाही करावी. ई-पीक पाहणी १०० टक्के पूर्ण करून त्यात हलगर्जीपणा करणाऱ्या अधिकारी-कर्मचाऱ्यांची जबाबदारी निश्चित करावी, अशीही मागणी आहे.
प्रमुख मागण्या
भरीव आर्थिक मदत, पीकविमा नुकसानभरपाई, चारा छावण्या आणि ग्रामीण भागातील पाणीटंचाईवर तातडीने उपाययोजना कराव्यात.